South Tuipuia vote chhiar turte hriat tur inhrilhfiah

Hnahthial district-a Assembly constituency awmchhun 29-South Tuipui vote chhiar tura inbuatsaihna kalpui mekah Thawhtanni khan Election Commission of India thuchhuak angin counting dress rehearsal neih niin, vote chhiar tura ruat counting supervisor, counting assistant leh micro observer-te tan training buatsaih a ni.
District election officer Chuauhnuna chuan vote chhiar chu huphurhawm a nih loh thu a sawi rualin, official ruatte chu an mawhphurhna theuh tha taka hlen turin a chah.
State level master trainer, SDO (Sadar) Neng Thianlala chuan vote chhiarnaa tel turte an hriat tur tul a hrilhhria a, counting agent ruat chungchang leh vote chhiar nia hriat tur tul leh pawimawhte hrilhin, EVM vote chhiar dan, postal ballot leh electronically transmitted postal ballot paper (ETPBS) chhiar dan inhrilhfiah a ni.
South Tuipui biala vote tla hi DC Conference, Hall Rallangtlanga chhiar tura ruahman niin, vote chhiarna tur table 9 bakah ETBPS table, RO table, observer table te hun a ni dawn. Table tinah mi pathum zel thu tura ruahman niin, counting supervisor, counting assistant leh micro observer an awm dawn a, observer table-ah micro observer 2 leh counting assistant 2 an awm dawn bakah RO table-ah ARO, supervisor, assistant leh micro observer pakhat theuh an thu dawn a ni. ETPBS table-ah supervisor bakah counting assistant leh DEO an thu dawn a. Vote chhiar hi round thuma zawh hman tura ruahman a ni.