English Premier League-ah table mawngphaha awm mek Southampton chuan pathianni zana an mikhual Tottenham an hneh loh hnuin an manager Russell Martin an ban.
Russell Martin hian season liam ta khan championship club Southampton hi a enkawl a, EPL a kaisang tur zawnna hnuhnung; play-off final-ah Leeds United hnehin EPL-ah a kaisanpui. EPL ah kaisang bawk mah se, khawvela tualchhung league lian leh harsa ber English Premier League 2024-25-ah bul an tan chhe ta viau thung. Saints hian season kal mekah vawi 16 an khel tawh a, vawi khat chiah an chak a, draw vawi hnih neiin tlawm zawkah vawi 13 ngawt an tang tawh. Khelh 16 atang hian point nga chiah an la hmu a, table mawngphah an luah nghet viau rih.
Table mawngphahah awmin, insiamthat mamawh viau mah se Southampton hi pathianni zana an mikhual Tottenham lakah 5-0 ngawtin an tlawm zui leh a, mualpho chiang hle. Tottenham tan hian James Maddison, Son Heung-Min, Dejan Kulusevski leh Pape Matar Sarr ten goal an thun a, an chakna goal ngate hi chawlhlawk hmaa an thun vek a ni. An mualah chiang taka an tlawm hnuin Saints chuan an manager Martin ban turin thutlukna an siam fel zui ta a ni.
Southampton hian an manager thar tur an zawng nghal a. Carabao Cup quarter-final-a Premier League hmahruaitu Liverpool an hmachhawn hunah chuan an Under-21 team manager Simon Rusk-a’n a lo kaihruai rih thung ang.
EPL table hnuai lama awm ten hmasawn an tum a, manager thar hnuaiah chona thar hmachhawn an duh. Southampton in Martin an ban rual hian table hnuai ber dawttu luah mektu Wolves pawhin an manager Gary O’Neil an ban ve bawk. Wolves hian an manager thar tan Al-Shabab manager Vitor Pereira rawih an tum dawn.
Southampton in Martin an ban
Get real time updates directly on you device, subscribe now.
Prev Post
Next Post