Spain in final an lut

Women’s World Cup khelh mek chu August 15, Thawhlehni khan semi-final hmasa zawk khelh a ni a. Inkhel hmuhnawm takah Spain chuan 2-1 in Swden an hneh a, final an lut.
Eden Park, Auckland, New Zealand-a inkhelah hian team hnihte an inhnehtawk viau a, goal pawh a lut har hle. Goal thun tumin innawr tawn viau a, inkhel hmuhnawm an lantir. Hun rei tak goal thun thei an awm loh hnuin hun tawp dawn hnaih minute 81-naah Salma Paralluelo chuan Spain hmahruaina goal a thun nawlh a, chak theihna hun tha tak an nei.
Goal an chhuah hnuin inelna neih meka chetha tak Sweden in goal thun tumin tan an khawh thar a, inkhel hmuhnawm zawk an lantir. Thih tha tak meuh meuha tan khawh an ni bawk a minute 88-naah Rebecka Blomqvist chuan goal thunin an si phurh a sut ta nge nge. An si phurh sutna goal lawmin phur viau mah se an phur rei lova goal an chhuah leh thuai. Minute 89-na lekah Spain tan Olga Carmona chuan hma an hruai nawn lehna goal a thun zui leh ta mai a. He goal hi chakpuiin, hmeichhe World Cup-ah a vawi khat nan final an inhlangkai zui ta a ni.
Champion lai USA hnawtchhuaktu an nih vangin Sweden hian champion turin rin an kai hman viau a, Spain lakah an vanduai ta thung. Sweden hneh thei an nih vangin Spain in rin an kai thar leh zual. Semi-final hnuhnung zawk hi vawiin tlai lamah khelh a ni ang a. Inelna thlengtu Australian chuan Stadium Australia, Sydney-ah England an hmachhawn ang.