Spain in Nations League final an lut

Zirtawp zan khan UEFA Nations League semi-final hnuhnung zawk khelh a ni a. Inkhel hmuhnawm zet mai; goal 9 ngawt luhna inkhelah Spain chuan 5-4 in France an hneh a, Portugal hmachhawn turin final an lut. France an hneh tum hian Ballon d’Or dawng tura rinkai Lamine Yamal chuan goal hnih a thun a, a vul leh pek hle.
MHPArena, Stuttgart-ah champion lai Spain in France an ngam viau a, darkar khat chuang awrh chauhah goal nga ngawt an thun hman. An khingpuite ngamin, an hmahruaina zau hman viau mah se an inthlahdah sual teuh hle thung. France in Spain lehthal ngei tumin tan an han khawh tak tak a, Spain in France er let an tuar lo teuh hle. Bul tan tha lo chunga a tawp khar tha France hian hun tawp dawn hnaihah goal thum ngawt an thun zawn a, an si phurh sut zovin tlawm an pumpelh teuh hle. An si phurh sut zo teuh viau mah se, ‘tling thelh apiang pawi tih a zual’ tih kha an chungah a tla a, uiawm taka tlawmin final an inhlangkai zo lo. Spain leh France te inkhel hi Ballon d’Or dawng tura rinkai pahnih; Lamine Yamal leh Ousmane Dembélé te inelna a nih tel vangin ngaihven a hlawh leh zual a. Thlir bing hlawh player pahnihte zingah Yamal chungnung zawkah a tang.
Champion lai Spain hian inkhel tir phat atangin ball an chang tam a, ball an thiamzia khawvel hriatah pho langin, rawlthar pahnih; Lamine Yamal leh Neco Williams te an hmuhnawm leh pek hle. Ball chang tam lutuk lo mah se France in goal thun theihna hun tha an nei hmasa zawk a, uiawm takin si nghak Unai Simon an paltlang zo lo. Goal thun tumin team hnihte an innawr tawn reng a, inkhel a hmuhnawm hle. Inkhel hmuhnawm takah hian Spain tan hian Arsenal in lak tuma an hel mek Neco Williams chuan minute 22-na kawh zetin top corner-ah a pet goal a, hmahruaina goal a thun.
Williams goal thun hian Spain a fuih phur viau a, goal dang an thun belh leh nghal thuai. Goal hmahruai an thun atanga minute thum hnu lekah Fuh tka an khingpuite an nawr let hnuin Arsenal midfielder Mikel Merino chuan lekah lei hrulah chiang zetin a pet goal a, an goal hnihna a thun. hmahruaina goal a thun. Si hnih faia hma an hruai hnuin Spain an khel tha chhunzawm viau a, ball an chang tam telh telh bawk. Chawlhlawk hmain France pawhin an si phurh sut then theihna remchang an nei naa Dembele chuan Simon a paltlang zo lo nawn leh a, chawlhlawk hmain goal an thun thei lo phawt.
Second half-ah Spain in bul an tan tha leh zuala, goal hnih an thun belh leh thuai. Second half tir teah Lamine Yamal chuan penalty a hlawhchhuak. A hlawhchhuah penalty ngei mai hi awlsam leh inringtawk zetin a pet goal a, minute 54-naah an goal thumna a thun a, an hmahruaina a tizau. 3-1 ngawta hma an hruai tawh vangin Spain an inringtawk viau tawh a, nuam ti takin France an hmachhawn.
Rawlthar duhawm Yamal-a’n an goal thumna a thun hnu lawkah Spain in hun tha an nei zui leh nghal zat. Fuh zeta an khingpui tlarhnung an thiah hnuin Pedri chuan minute 55-naah an goal lina a thun zui leh nghal zat. Spain in Yamal goal goal thun an lawmna au ri a reh fel hma hmain France hian goal an chhuah belh leh zat a, Spain lakah an talbuai tak zet.
Nuam ti taka inlan Spain in an duh tawk mai lo va, goal khat an thun belh leh thuai. Penalty atanga an goal thumna thuntu Lamine Yamal chuan minute 67-naah fing leh fuh takin an goal ngana a thun zui leh. Barcelona rawlthar duhawm Yamal hian France laka a goal hnihna hi Real Madrid player ropui Cristiano Ronaldo goal lawm dan ang deuhin a lawm teh tlat a, hei hian sawi zui a hlawh viau nghe nghe a, media hrang hrangah hmun a chang tam zui hle.
Minute Darkar chanve vel bak khelh tur a awm tawh loh laiin Spain hian 5-2 ngawtin France lakah hma an hruai a, hun la tawp em lo mah se chak tur zawk a chiang thawkhat a, Spain in final an lut angah a ngaih theih hial tawh a, France dinhmun a chhe tak zet tawh. An dinhmun chhe viau tawh mah se France an hnual mai lova, an zam mai hek lo. Huaisen takin an khingpuite an nawr let a, goal thum ngawt an thun belh.
France an hian Kylian Mbappe chuan minute 59-naah penalty atanga goal thunin an si phurh a sut then. Minute 79-naah Cherki chuan an goal hnihna a thun a, he goal hian phur tharna tlem a pe a, an nguai lutuk tur a thing harh. goal thum ngawta an la hnufual laiin minute 84-naah Spain playerDani Vivian chuan chiang zetin an lamah a ti-goal a, France a tiphur leh zual. An si phurh sut tuma tan khawh nasa tak France tan hian Randal Kolo Muani chuan minute 90’+3-naah an goal lina a thun zui leh ta mai a, chak let theih beiseina an nei ’sang leh zual. An si phurh sut zawh tum viau mah se goal dang an thun belh thei tawh lova, goal 9 ngawt luhna inkhelah uiawm takin Spain lakah an tlawm zui ta a ni.