Spain in Scotland an chelh

October 12, Ningani zan khan Euro 2024 khel tur zawnna khelh chhunzawm a ni a. Spain chuan inelna khel tura point khat chiah mamawh tawh Scotland chu si hnih faiin an hneh a, an chelh khawtlai. Inkhel dangah Norway in an khingpui Cyprus chu si li faiin an hneh a, Euro khelh phak beiseina an nei sang zui zel.
Football thiam ram, player Tha tak tak kawl khawmtu Spain hian Estadio Olímpico de la Cartuja, Sevilla-ah Group A-a hmahruaitu Scotland an mikhual a, hun tawp dawna goal hnih an thun hmaga hnehna hlu tak changin, an mamawh point thum an hmu.
Euro 2024 khel tura point khat chiah mamawh tawh Scotland hian an mamawh point hlawhchhuah ngei tumin Mimualah Tan an khawh a, an vannei tel deuh bawk nen an hlawhtling theuh hle. Spain hian chak ngei tumin an mualah Tan an khawh nghal chat a, inkhel tirteah Ferran Torres chuan goal thun theihna hun Tha zet mai a nei nghal a, uiawm takin a hlah tlat thung. Spain hian chawlhlawk hmain an mikhualte an nawr bet tlat a, goal thun theihna hun Tha nei mawlh mawlh mah se an chhawr Tangkai zo lo vek a, Morata goal thun pawmsak an ni lo bawk.
Chawlhlawk hnu lamah Scotland in bul an Tan Tha hmasa a, freekick aTangin goal an thun. Mikel Merino free kick goal mawi zet mai hi tumahin tawk lo mah se offside vangin hnawl a ni teh tlat thung. He goal an pawm tak loh hi Scotland lam hian an sawi zui rei viauin a rinawm.
Goal an chhuah thuak hnuin Spain an insiamTha nghal a, hun tawp dawn hnaihah goal an thun ta nge nge. Minute 73-naah Alvaro Morata chuan Navas siamsak Tha tak chu hnaite aTangin a tauh goal a, hmahruaina goal a thun. Hmahruaina goal an thun hnuin an khel Tha zual sauh a, goal an thun belh leh thuai. Scotland tlarhnung tihsual vangin goal thun theihna hun remchang an neih chu chhawr Tangkaiin Oihan Sance chuan minute 86-naah a pal goal a, an hmahruaina a ti zau.
Team lian laka goal hnih an chhuah hi Scotland in an sut thei lova, Euro khel tur zawnna kal mekah a vawi khat nan an tlawm a, Euro 2024 khel tura tlin chian an tumna an puitlin zo rih lo.
Group A-a inkhel dangah Norway chuan AEK Arena, Larnaca-ah Cyprus an hmachhawn a, si li faiin hnehna an chang. Norway tan hian Alexander Sørloth chuan minute 33-naah hmahruaina goal a thun a, si khat faia hmahruai chungin chawlhlawk an hmang.
Chawlhlawk hnu lamah Norway an khel Tha leh zual a, goal thum an thun belh. Minute 65-naah Erling Haaland chuan an goal hnihna a thun a. City forward Haaland hian minute 72-naah an goal thumna a thun zui leh bawk. Si thum faia hma an hruai hnuin Fredrik Aursnes chuan minute 81-naah an goal lina a thun zui leh bawk.
Group A-ah hian khelh ruk aTanga point 15 hmuin Scotland in hma an hruai a. Point 12 hmuin Spain an dawt a, pathumnaah Norway an awm mek a ni.