Spain leh Italy an tlang

UEFA European Under-21 Championship khelh mekah Thawhlehni zan khan Group A leh C a mite an inching fel a, group A atangin Spain leh Italy ten quarter-final an lut. Group C atangin Portugal leh France an tlang ve bawk.
Thawhleh zan khan he inelna hnuhma nei tha pahnih; vawi nga champion tawh Spain leh vawi li champion tawh Italy te an inhmachhawn a, 1-1 in an inhnehtawk. Group champion nih inchuhna inkhel pawimawh takah Spain leh Italy an inhnehtawk viau a, inkhel hmuhnam tak an lantir. Inkhel hmuhnawm takah hian chawlhlawk hmain goal lut thei a awm lo phawt.
Chawlhlawk hmaa goal lut a awm theih loh hnuin chawlhlawk hnu lamah goal a lut ta thuai thung. Minute 53-naah Spain tan Jesús Rodriguez chuan hmahruaina goal a thun. Goal thun hmasa zawk an nih vangin phur viau mah se Spain hian goal an chhuah zui thuai a, an phur rei thei bik lo. Goal an chhuah atanga minute ruk hnu lekah Italy tan Niccolò Pisilli chuan goal thunin an si phurh a sut. Minute ruk chhung lekin goal hnih lut bawk mah se hun tawp thlengin goal dang a luh belh thei tawh lova, 1-1 a inhnehtawkin an inthahnen.
Group A-a inkhel dangah inelna thlengtu Slovakia chuan an khingpui Romania chu 2-1 in an hneh a, point thum nen a tawp an khar. Group A-ah hian Spain leh Italy in point 7 ve ve an hmu a, point ruk ve ve hmu bawk mah se Spain chu group champion an ni a. Pahnihna ni chungin Italy an tlang ve bawk.
France leh Portugal an chak awlsam
Thawhleh zan vek hian Group C a mite an inching fel ve bawk a, France leh Portugal nen awlsam takin hnehna an chang a, group stages an paltlang ve bawk.
Point ruk hmu tawh France hian point la hmu lo Poland an hmachhawn a, 4-1 in hnehna an chang. France hian Poland lakah bul an tan tha viau a, darkar chanve chhungin goal thum ngawt an thun hman. Inkhel tan atanga minute 18-na lekah Nathan Zeze chuan hmahruaina goal a thun a. Goal hmahruai an thun atanga minute khat pawh tling loah Djaoui Cissé chuan an goal hnihn a thun belh leh zat. Inhnaih chilh taka goal hnih an thun hnuin an goal hnihna thunu Cisse chuan minute 29-naah an goal thumna a thun belh zui leh zat a, 3-0 a hmahruai chungin chawlhlawk an hmang.
Chawlhlawk hnu lamah inkhel a hmuhnawm zui viau a, goal thun tumin an innawr tawn nasa hle. Poland in an si phurh sut tumin tan an khawh nasa hle a, an beiseina tisang leh zual turin Ariel Mosor chuan minute 61-naah goal thuin an si phurh a sut then. An si phurh an sut then vangin phur viau mah se hun tawp thlengin goal an thun belh thei lo. Goal lut a awm belh theih loh reng hnuin France tan Matthis Abline chuan minute 82-naah goal thunin a tawp a khar a, Poland lakah 4-1 in an chak zui ta a ni.
Group C-a inkhel dangah Portugal chuan inkhel tan atanga minute ngana lekah kim lo nghal Georgia chu 4-0 ngawtin an sawp a, awlsam takin point thum an hmu ve bawk. Group C-ah hian point France leh Portugal in point 7 ve ve an hmu a. Goal difference-a tha zawk Portugal chu group champion an ni.