Spain women’s team buai tawh lo – Bonmati

Women’s World Cup khelh zawh taka Spain champion-puitu player pawimawh leh player of the World Cup-a thlan ni bawk midfielder Aitana Bonmati khan Spain’s women’s team chhung-kuaa buaina chuan mual a liam fel tak avangin football ngawr ngawrah an insawrbing thei tawh tih a sawi.
Tarlan tawh thin angin, August ni 20 final match khelh zawh lawm-man sem laiin Spanish football federa-tion presi-dent atanga bang ta Luis Rubiales khan forward Jenni Hermoso lawmman dawng zo chu lo kuahin, eng khaw sawi set set loin a hmui-ah a fawhsak ringawt a, a bulah mi pawimawh tak tak an din khup lai leh khawvelin a thlir thup laia an president chet dan khan dem a hlawh a, player-te’n team an ‘boycot’ phah a, manager Jorge Vilda an ban a, a hnuah tum lo teh mah se Rubiales pawhin banna a thehlut ve ta nge nge a nih kha.
Karliamta Nilaini khan Spain hmeichhe football team chuan national team an ‘boycott’ chu an titawp ta a, team-ah kirlehin, Zirtawpni khan Sweden hma-chhawnin 3-2 hnehna an chang zui ta nghe nghe.
Sweden an hnehna Women’s Nations Lea-gue game kha World Cup final hnu lama an inkhelh leh vawikhatna a nih bakah head coach thar Montse Tome hnuaia an match hma-saber a ni nghal.
Spanish football fe-deration lamin an hmei-chhe team chhunga danglamna thlentir an tiam tak avangin player tam zawkin team an zawm leh tawh a, Swe-den ramah match an khel zui a; kum 25 mi Bonmati tawngchhuakin, tunah chuan team chhunga harsatna an neih tawh loh thu leh football ngawr ngawra an insawrbing theih tawh thu a sawi.
Uefa Women’s Play-er of the Year leh World Cup Golden Ball winner Bonmati chuan, “Sports leh khawtlang nunah mite entawn tur kan hnut-chhiah a, chu chu mipa leh hmeichhia angkhat renga en tur tih kan champion-pui a ni.
“Team kan boycott tir lam ni hnih khat chhung kha kan chiai angreng a, rilru hahna leh buai ruknain min chiah a, mahse, ni a herliam zel a, thil pawh a danglam ta a, tunah chuan football-ah kan insawrbing leh thei ta a, chu chu kan duh ber a ni,” tiin.