Spanish La Liga table lerah Barcelona kirleh

Spanish La Liga table lerah Barcelona kirleh
Inrinniah Real Betis khelmuala Real Madrid tlawm laiin inkhel dangah Atletico Madrid chuan sikhat faia an mikhual Athletic Club hneh chungin Diego Simeone-a team Atletico chuan an hmaa awm pahnih Barcelona leh Real lehpein Spanish La Liga table-ah hma an hruai zet a, Pathianni zanah Catalan team-in sili faia an mikhual Real Sociedad sawp chungin league hmahruaitu nihna an chang chhunzawm ve leh.
Olimpic Lluis Companys stadium-a mipui 46,324 lutkhawm hmaah Barca-in an mikhual Sociedad an dim lo kher mai a, first half-ah Gerard Martin leh Marc Casado-te goal hmangin goal hnih an thun phawt a, second half-ah Ronald Araujo leh Robert Lewandowski chuan khung belh ve lehin, an kawtkaia an point thum hlawhchhuah hmangin Hansi Flick-a team hian table ler an luahkir leh ta a ni.
Khati taka Real Sociedad tlawm pherh erh chhan kha first half minute 17-na leka an player Aritz Elustondo hnawhchhuah a nih vang a tih loh theih loh ang a, goal thun thei dinhmuna ding tawh Dani Olmo a tihtluk avangin mikhual defender hi straight red card hmanga hnawhchhuah a ni a, kha khan mualneitu team tan kawng a tiawlsam ta a ni.
A tam zawk an nih hnu lawk minute 25-ah Olmo siamsak atangin Martin chuan home team goal hmahruai thunin, minute li a liam hman lo tih ah Olmo thawhrah atang bawkin Casado goal kan hmu chhunzawm leh a; second half-a an goal hnih khung belh leh nen nuamsain Nou Camp club-in hnehna an chang a, khelh 26 ve veah Atletico nen point khatin an inthlau a, pathumna ni ta Real lakah point thumin an chungnung ta bawk.
Pakuana luahtu Sociedad khan Ningani Europa League last 16 lamah Manchester United an tum dawn.
Poland striker Lewandowski khan top scorer nihna kawng a zawh zui zel a, Pathianni zanah pawh mikhual goal-veng Alex Remiro tana dan zawh loh goal khungin scoring chart-a a hmahruaina a belhchhah leh.
Hansi Flick-a team kha a zawnin league-ah vawisarih zet an chak tling ta a; match 26-ah point 57 humin, pahnihna Atletico Madrid chuan point 56 an nei a, Inrinni Real Betis khelmuala 2-1-a tlawm Real Madrid chuan point 54 neiin, thuang thum atanga title race chep tak karah tunge nui hnuhnungber dawn tih erawh sawi mai theih a la ni lo!