Spanish Super Cup final – Claciso
Spanish Super Cup final – Claciso
Ningani zan khan Spanish Super Cup semi-final hnuhnung zawk khelh niin, 2-1-a Atletico Madrid hnehtu Real Madrid an tlang a, anmahni lo nghaktu Barcelona nen Pathianni hian final an khel ang.
Spanish football-in huang an zauhna kawngah Super Cup hi Arab thlaler vaivut hmunah an suan chhuak a, Ningani zan Saudi Arabia ram khawpui lian Jeddah khelmualah Arab mipuiin Madrid derby an thlir.
King Abdullah Sport City-a Alinma Bank Stadium inkhelah hian goal a lut hma hle a; tan atanga second 77 an khelh tlin rualin Los Blancos captain Federico Valverde chuan free-kick a atangin Real Madrid hmahruaina goal a chhuihlut kual er ngawk a; kha 30-yard free-kick kha Atletico goalkeeper Jan Oblak tan tih ngaihna a awm ngang lo!
Half time thlengin Xabi Alonso team hian si khat faiin hma an hruai phawt.
Second half-ah pawh Bernabeu club bawk goal-a chefuh hmasaah tang lehin, Rodrygo chuan minute 55-ah Valverde siamsak atangin Real goal hnihna a tilut ve leh.
Minute thum an khel tling leh tihah Alexander Sorloth chuan Atletico beiseina siamsakin an siphurh pakhat zawk sut then mah se a khawi lam lam mahin goal dang an khung belh zo lo a, tum 13 ngawt Super Cup champion ni tawh Real Madrid zawkin final an lut.
Atletico khan hun pumin goal chance tum 22 ngawt nei mah se Norwegian striker Sorloth-a goal bak lawm tur an nei zo lo a, inhliam Kylian Mbappe tel loin Real-in hnehna an sualchhuak thei hram a ni.
Goal khat thawhtu Rodrygo leh a game khelh hnuhnung 16-a goal khat mah khung zo lo Vincius Junior-te khan chance an hloh ve ve a, chuti ni lo se Real kha chiang lehzuala chak thei tur an ni.
Nilaini khan semi-final hmasa zawk khelh niin, Barcelona chuan 5-0 tehrengin Athletic Club an sawp a, naktuk, Pathianni hian nikum October thla Bernabeu khelmuala 2-1-a an hneh loh Real Madrid ngei kha Jeddah khawpuiah an hmachhawn leh dawn a, Hansi Flick-a team hi an chak lo leh a nih chuan season kal lai Clasico-a an vawi hnih tlawmna a ni tawh ang.
Saudi Arabia rama Spanish Super Cup khel tur hian Spanish Football Federation (RFEF) leh Arab mite’n inremna an ziak a, chu chu pawtsei lehin, kum 2029 thlengin he tournament hi tuialhthei ngah ramah hian an khel chhunzawm zel rih dawn a ni.