Rev Dr Ramengliana
-- Advertisement --
Tunlai mite tan ‘Spartacus’ tih hming chu thil thar lutuk a ni lo mai thei. Kraws nena sawi zawm erawh chu a khat deuh mahna. Spartacus hi Rom sorkar vanglaia sal hovin zalenna an sualnaa an hotupa ber pakhat a ni a. Isua pian hma kum 103-71 BC chhung vela khawsa, khawvel chanchina a lansarh hun pawh kum 3 vel chauh niin an sawi. |hangtharten an hmelhriatna erawh chu a chanchin behchhana television series lar tak an siam tak vang a ni ber awm e. Tun hma 1960 daih tawh khan film star lar thin Kirk Douglas a kha Spartacus anga changin film tha tak an lo siam tawh bawk a. Spartacus-a hringnun behchhana a hmuh nawm thei dan tur bera an siam ni mah se a tawp lama krawsa an khenbeh dawn thil thleng vel hian ka rilru a la ve riau thin a.
Antonious nen
Spartacus kha sal a ni a, Gladiator an nih tir a, eng emaw ti tiin Rom laka helna paw chhuakin sal zalenna a sual ta a, an hruaitu pawimawh ber a ni chho ta a ni. Chu zalenna an sualna-ah chuan sal tlan bo ve tho Antonious nen inngainain pafa ang maiin an khawsa ta a. Rom sorkar meuh chu an hneh zawh tak loh avangin a tawpah an man dun a. Kawng dunga krawsa khenbeh tlar tur zinga mi an ni ta a. Rom general Crassus chuan khenbeh mai chu duh tawk lovin pafa ang maia Rom sorkar lo dotute chu inhaw ber anga chem sen nena insualtir a tum ta a ni. Sal ho chan hi a chau thin ngawt mai. Keini chuan hemi scene-ah hian kraws-a khenbeh hrehawmzia kan hmu thei ruak ruak a, kan Lalpan kan tana tuarna nasatzia pawh engemaw chen chu kan hrethiam thei a ni.
General Crassus-a rawnzia
General Crassus: Centurion, Spartacus leh Antonious te kha ngunhnam pe ve ve la tunah inbei rawh se. An phuarnate kha phelh nghal rawh.
Centurion: Mi zawng zawng hnenah i thlahtute temple kawtah an inbei dawn tih kan puang tawh sia!
Crassus: Tunah hian he hmunah ngei hian ka hmuh turin an inbei ang. Thih thlengin an inbei ang. A chak zawk zawk chu krawsah kan khengbet dawn a ni. Heng salte hi eng ang taka inhmangaih nge an nih kan en ang chu.
Spartacus: Antonius, hmuhnawm an tih tur mai maiin an hmaah insual tur kan ni lo a nia. Lo inveng miah lo la, ka that nghal mai dawn che nia. Kraws-a thih i tan a rapthlak lutuk ang.
Antonious: Ka pu, nang zawk hi Kraws-ah zawng ka khenbehtir lo tawp ang che. Chuti tur chuan ka phal thei lo che.
Spartacus: Ka thupek hnuhnung ber a nih chu. Zawm mai rawh.
Crassus: |an tir tawh rawh le.
(Antonious chuan Spartacus chu a ngunhnamin an vai fua mai a)
Antonious: Kraws-ah ka khenbeh tir dawn lo che, ka tih kha.
Spartacus: Kraws-a khenbeh ten an tuar reizia i hria em? I tuar lovang. Na hre lova i thih thuai i tan a tha zawk.
Antonious: Kraws chu ka hmachhawn mai ang. I tuar erawh ka phal thei lo. (Kraws pumpelh induhsaktawnna avanga inthah tumin an inbei ta a. Spartacus chuan Antonious chu a vit ta, a chatthla dawn)
Antonious: Ka hmangaih che. Spartacus. Mi hringtu ka pa ka hmangaih tlukin ka hmangaih che.
Spartacus: Ka fapa kan nuin a pai mek ka mitin a hmuh ngai loh tur ka hmangaih angin ka hmangaih che.
(Antonious a thi riai riai. Spartacus mittui a tla zawih zawih)
Spartacus chu krawsah an khengbet ta a. A nupui Varina-in a rawn hmu. A ke vuan ngawih ngawihin…
Varina: Aw Spartacus, ka hmangaih, ka hringnun…Thi rawh…Thi teh..Thi thuai teh…Aw Pathian!….Eng vangin nge i thih mai theih loh aw!
An tum loh khanah ka chang chhuak daih
He film hlui tak hi hmuhnawm ka ti hle mai. Tunlai mite angin film siam te thiamin hmanrua la changkang lo mah se a changtute an thain a hun lai na na na-ah chuan a hit pawl tak a ni awm e. Sal ho tuarna lam han chhiar leh han en hi chuan Kristianna zar khawvelin a zo nasatzia a lang thin. Chanchin |ha êng pawn lamah hi chuan mihring hlutna hi a inang lo hle thin a. Chanchin |ha hian hlutna intluktlang min pe a, vawiin khawvelah chu chu kan chen a ni tih tam takin kan hre lo. Tin, he film script ziaktu leh a innghahna novel ziaktu hi a thiam thlawt mai. Kristian rilru a neih ka ring pha lo va mahse krawsa thih rapthlakzia a pho chhuak thiam hle. Mi pahnih inhmangaih ngawih ngawihte chu inthah tumin an inbei a. Chak zawk nih an tum pawh an him tum vang ni lovin thihna nuam zawk an induhsak vang a ni mai zawk a. Insual duh lovin an inpan lo mai thei ang. Mahse, kraws hrehawm leh rapthlak inpumpelhtir tumin inthah an tum ta zawk a ni!
Tuarna kawngpui
Heng zawng zawngah hian kan Lalpa zawh kraws kawng rapthlakzia a lantir a. Chu chu a duhna liau liauva a zawh a ni lehnghal. Mihring ngaihtuahna chuan ‘Kraws kawngah lo he Chhandamna hi chhar theih a ni tho lovem ni? Pathian a nih chuan thil dang pawh a ngaihtuah chhuak thei awm si a,’ tiin a chhut fo. Mahse kan Lalpa hian Pathian hmangaihna ropui puan chhuah nan Kraws kawng a thlang a. He tuarna vawrtawp leh channa famkim thei ang ber hian Pathian Hmangaihna chu a pho chhuak chiang ber mai a. Chuvangin kawng ropui leh chhuanawm, kawng mawihnai leh duhawm, mihring ngaiha kawng tha ber ber anga langte ai chuan he tuarna kawngah ngei mai hian Hmangaihna chu a lang fiah a nih hi. Amah kan hmangaih letna kawngah pawh kan zawh tur kawngpui chu he kawng hi a ni ngei ang le. Hei tak hi mihring rilru leh Pathian atanga chhuak rilru danglamna chu a ni thin a. Tuarna pumpelh tum reng rilru hian a man fuh hleithei lo a nih a nih pawhin a mak lo ve.