Vote hlutna…

Tun atanga ni 20 hnuah Lok Sabha MP inthlan kan hmachhawn dawn a, mipuiin kan aiawha ram rorelna thutthlenga thu tur kan thlang leh dawn a ni a, mipui pawimawhna a lo lang leh ta.
Mizoramah hian State Assembly election aiin, MP election-ah vote a tla chhe tlangpui a, vote tlak dan inthlauhna hi 20% lai te a tling thei. Entir nan, 2013 Assembly election kha vote tlak that ber tuma ngaih a ni a, 83.41% a tla a. A kum leh lawk 2014-ah MP (LS) election-ah chuan 61.69% a tla a, hei hi 2009-a MP election voter turnout aiin 10% chuangin a la sang zawk nghe nghe.
MP election hi mipui hian kan ngaihthah deuh bik tih a lang a, hei hian vote hlutna kan la varpawh tak tak lohzia a lantir a tih theih awm e.
Democracy ramah chuan mipuiin vote hmangin ro kan rel a ni ber a, mahse kan rorelna hmanrua ‘voting’ hi kan hman dik loh chuan a tuartu tur chu keimahni tho kan nih avangin, kan aiawha rorel tur kan thlan hian namnul vel mai mai lova, rilru leh tihtak zeta ngaihtuahna seng chunga vote kan thlak hi a pawimawh em em a ni tih hi kan hriatchian a ngai.
Vote thlak ve si, ‘thlan ber tur pawh ka hre lo, ka risk vel mai mai…’ tih ching an awm thin a, hei hian voting hlutna zawng zawng a tichhe vek a, vote thlak hrim hrim ringawt hi khua leh tui ten kan duty kan hlenchhuahna a ni mai lova, vote kan thlak hmain, ngun taka duhthlanna thiang tak, tuma sal beh loh zalenna hmanga ngaihtuahna kan sen hian, khua leh tui kan nihnaa kan mawhphurhna hlenchhuahna dik tak zawk chu a ni.
Mizote hian vote hlutna hi a nihna tur angin kan la varpawh tak tak lo niin a lang thin a. Vote kan thlak hian ram rorelnaah kan tel ve a, kan aiawha kan duhzawng leh tha kan tih zawnga rorel thei tur kan thlang tih hi kan hriat a pawimawh hle. Therhlo leh a behbawm, rei lo te atana mimal hamthatna um vang ringawta vote kan thlak a nih chuan, ram inrelbawlna tha leh hmasawnna tur a thlen theih loh phah thei a. Kan aiawha roreltuten ram an awp tha lo nia kan hriat hunah, ‘vote ka hman dan kha a dik em?’ tih inenfiah nan kan hman fo a tha awm e.