Speedcuber Max Park-a’n 7×7 cube record a siam

Nikum khan 3x3x3 cube rem dik rang ber record siamin, second 3.13 chhungin a rem dik hman a, Max Park chuan record dang a siam leh ta a, 7x7x7 puzzle cube rem dik rang thei ber a ni leh ta, minute khat leh second 41.78 chhungin a rem dik hman a, a hmaa hetiang record pawh ama siam tho hi niin, second 34-in a record hmasa hi a khum leh ta a ni.
Max Park hian University of Heights Cubing Winter 2024 event, California, USA-a neihah record thar hi a siam a, 7x7x7 hi puzzle cube-ah rau rau pawh rem dik har ber pawl a ni a, combination awm thei hi 232 duoquinquagintillion (1 bakah zero hlir 168 a awm, a number tam lam hi chhiar sen a ni tawh lo).
Max hian cube rem dik lamah hian a hming a chher tawh hle a, 5x5x5 world record pawh UCSD Winter 2023 event, nikum December-ah khan siamin, a single-solve time chu second 32.60 niin, average-solve time chu second 35.94 a ni ve thung.
Max hi autistic a ni a, a chhungte chuan speedcubing hi a tan chuan therapy tha tak niin an sawi a, “Max hian a tui bottle chhin pawh a hawn theih loh lai te pawh a awm a, mahse, Rubik’s Cubes hi a tuipui ta a, hei hi a tan therapy tha tak a ni,” an ti.
Max hi kum 10 a tlinin spedcubing competition-ah a tel ve tan a, tunah chuan kum 22 a ni tawh a, speedcubing world record chi hrang hrang a siam hnem tawh hle a, a record siam tawh te chu:
3x3x3 cube remdik rang ber- 3.13 sec
3x3x3 cube kum pakhat chauh hmanga remdik rang ber- 6.20 sec
4x4x4 cube remdik rang ber- 16.79 sec
4x4x4 cube average-slove rang ber – 19.38 sec
5x5x5 cube rem dik rang ber- 32.60 sec
6x6x6 cube rem dik rang ber- 59.74 sec