‘Spider-Man: Brand New Day’ trailer-in record a siam

‘Spider-Man: Brand New Day’ trailer-in record a siam
‘Spider-Man’ film thar tur ‘Spider-Man: Brand New Day’ trailer chuan vawi tluklehdingawn en a hlawh tawh a, record siamin, movie trailer zingah vawi tluklehdingawn hlawh thei hmasa ber a ni.
Spider-Man lema Tom Holland channa thar ber trailer hi March ni 17 khan Sony-in an tichhuak a, nimin khan vawi tluklehdingawn 1.1 en a hlawh tawh. WaveMetrix data atanga a landan chuan he film trailer hian an tihchhuah atanga darkar 24 chhunga movie trailer zinga entu ngah ber record a siam tawh bawk.
‘Spider-Man: Brand New Day’ trailer hi March ni 17-a an tlangzarh khan darkar 24 chhungin vawi maktaduai 718.6 en a hlawh hman a, chu chu trailer zinga darkar 24 chhunga entu ngah ber record a ni a, a hmaa he record siamtu chu video game ‘Grand Theft Auto VI’ trailer kha niin, darkar 24 chhungin vawi maktaduai 475 en a hlawh thei.
Spider-Man: Brand New Day hian movie trailer zinga darkar 24 chhunga entu ngah ber record pawh a siam nghal a, a hmaa he record siamtu cu ‘Deadpool & Wolverine’ trailer kha niin, darkar 24 chhungin vawi maktaduai 365 en a hlawh hman a, he record hi Spider-Man film thar tur trailer hian darkar riat chhungin a rawn khum hman!
‘Spider-Man: No Way Home’ trailer pawh kha a hit hle mai a, an tlangzarh atangin darlar 24 chhungin vawi maktaduai 355.5 en a hlawh hman a, hei pawh hi movie trailer zinga darkar 24 chhunga entu ngah ber te zingah a tel pha a ni. He film hian an tlangzarh hnuah pawh cinema hall ticket hralhna atangin khawvel huapin dollar tluklehdingawn 1.9 a la lut thei a, Hollywood film zinga sum la lut tam ber te zingah a tel pha bawk.
‘Spider-Man: Brand New Day’ hi Destin Daniel Cretton direct niin, Tom Holland chu Peter Parker lemah a chang leh a, Tom Holland nena innei tawh niawma thu thang mek Zendaya pawh inlan lehin, Sadie Sink, Jacob Batalon, Jon Bernthal, Mark Ruffalo, Michael Mando te pawh an inlan a, July ni 31 khian cinema hall-ah an chhuah tan ang.