Sri Lanka president in India lo tlawh

Sri Lanka president in India lo tlawh
Sri Lanka President Anura Kumara Dissanayake chu Thawhtanni khan India-ah lutin an ram hotu ber a nih hnua ram danga a zin hmasak ber a ni a, an inkar tihngheh lehzual tumin an thenawm hi a tlawh.
Thliarkar ram hruaitute hian an chhehvela ram thiltithei ber, China nena Indian Ocean-a thuneihna sang zawk neih tuma inel reng, India hi tlawh hmasak berah an nei fo thin.
Dissanayake hi September atang khan an ram hotu ber niin ei rukna nuai bo a tum a. Thawhtanni zan khan Indian Prime Minister Narendra Modi nen New Delhi-ah an inkawm.
Dissanayake hian India a thlen hnuah finance leh foreign minister te hmu tawhin inkawmna hlawk tak an nei tih a sawi a, National Security Adviser Ajit Doval a kawm bawk.
‘Kan tum ber chu Indo-Sri Lanka economic cooperation a ni a, hei hi investment-a hun inhawng te, kan chhehvel himna te leh thil dang, tourism leh energy-a inkungkaihna thuk zawk a keng tel a ni,’ tiin Dissanayake chuan thuchhuah a siamah a sawi. ‘Heng inkungkaihna hian ram pahnihte inkara thuk zawka inpawhna a tinghet a ni,’ a ti bawk.
New Delhi hian Beijing-in Sri Lanka-a insawh ngheh a tumna a ngaimawh hle a. Hemi do let tur hian India hian tun hnaiah Sri Lanka-ah hian project hrang hrang a din a; mahse, China hi Sri Lanka-in a thawhpui ram lian ber a la ni reng tho. Dissanayake-a pawh hian nakkumah Beijing tlawha Chinese hruaitute kawm a tum a ni.
Sri Lanka hian kum 2022 khan sum leh paia tlakchhiatna nasa tak a tawk a, foreign exchange-a ni tin mamawh – ei tur, tuialhthei leh damdawi lak luhna tur a tlachham a, ba pawh $ tluklehdingawn 46 zet a nei a ni.