SSA zirtirtute nghehna tur court order khinglet dawn lo

Mizoram sawrkar hnuaia SSA hunlaia zirtirtu lak, dahngheh tura High Court-in a tih tawh chu state sawrkar hian khinlet tum mah se, chief minister thu angin khinlet a ni dawn lo nia sawi a ni.
Mizoram SSA Teachers Association (MSSTA) chuan Thawhlehni khan chief minister Zoramthanga hi a office-ah an hmu a, Gauhati High Court Aizawl Bench-in SSA zirtirtute dahnghet tura a tihna order, sawrkarin khinlet a tum chungchang an sawipui.
MSSTA ngenna angin, chief minister hian sawrkarin court thuthlukna khinlet tura thu an lo tih tluk tawh chu khinglet lo turin School Education secretary phone-in a hrilh nghal tih MSSTA hian sawiin, lawmawm an tih thu an sawi.
CM hian all CSS (centrally sponsored scheme) tana Special Regulation Scheme siam mek a lo hrilhfiah a. SSA zirtirtu chungchanga Court thutlukna chu he scheme siamna kawnga tihuaisentu leh remchang siamtu a ni tih a lo hrilh thu an sawi a ni.
High Court thutlukna leh all CSS huam tur scheme thar chungchangah member-te ngaihtuahna a kal thuiin rilru an seng nasa hlawm tih an hriat thu MSSTA hian sawiin, judgement awm tawh sa karah sawrkar lam hi a hlawhtlinna tura fawng vuantu an ni si a, hma lak an thiam theih nan ngaihtuahna seng zel turin an inchah nghal tiin thuchhuah a siam.