St. Joseph HSS-in zirlai chawimawi

St. Joseph Higher Secondary School chuan Bawngkawna an school building-ah kumin HSLC leh HSSLC exam-a an zirlai tithate chu Zirtawpni khan an chawimawi.
School principal C Laltlansanga chuan HSLC leh HSSLC exam-a result tha tak an neih theih chhan chu zirtirtute taimak leh thawhrimna rah a nih bakah zirlai fel tak takte tumruhna, taimakna leh thahnemngaihna vang a ni tih a sawi a. Chumi piahlamah zirlai nu leh paten an fate an school-a an lo luh tir ngamna avanga hlawhtlina chang an ni, tiin a sawi.
St. Joseph HSS hian kumin HSLC exam result-ah 3-na, 4-na, 5-na, 9-na leh 10-na hauhin, school mala top ten-a lang tam ber an nih bakah science subject bikah zaa za mark hmu zirlai 6 an nei a, social science-ah subject topper an nei tih a sawi a ni.
HSSLC exam result-ah pawh commerce subject-ah 2-na, 4-na leh 10-na neiin, science stream-ah 5-na, arts-ah 9-na huahin, stream tinah top ten an nei a; business mathematics, public administration leh home science subject-ah topper an nei.
St. Joseph HSS hian kumin NEET exam-a Mizoram state topper Jonathan C Lalhruaitluanga, an school atanga class-XII science zirchhuak hnenah chawimawina an hlan bawk.