STA rate siam ang hman theih nan hma laksak turin DTO ngen

State Transport Authority-in rate a siam anga sumdawnna atana hman lirtheite an tlan theih nan hma laksak turin Kolasib District Consumers’ Union chuan Kolasib District Transport Officer an ngen.
Kolasib District Consumers’ Union (KODCU) hian DTO Kolasib hnenah State Transport Authority (STA) hriattirna siam anga Kolasib district chhunga lirtheia sumdawngten rate an hman theih nan hma la turin a ngen a. He ngennaah hian maxi cab chuan man a kawk deuh nia hriat a ni.
STA rate-in a tarlan dan chuan, maxi cab chuan man hi metalled road-ah mi pakhat tan km khatah Rs. 3.50 tur niin, metalled road loah km khatah Rs.4 tur a ni. Aizawl leh Kolasib inkar chu km.83 niin, STA rate ang chuan maxi cab chuan man hi Rs.290.50 tur a nih laiin, tuna chuan man chu Rs.350 a ni. Silchar leh Kolasib inkar km.97 chu STA rate ang chuan, Rs. 339.50 tur niin, tuna chuan man chu Rs. 400 a ni. Kolasib leh Bairabi inkar pawh km.34 niin sawrkar rate ang chuan maxi cab chuan man Rs.119 tur a ni a, tuna an rate chu Rs. 150 a ni tih KODCU hian a sawi.
‘Hetiang rate ang hian maxi cab-te hi tlan a, mi harsa zawkte tan inpekna thar nei turin lirthei neitute kan ngen a ni,’ a ti.
Hetihlai hian maxi cab neitute chuan STA rate thar chu kum thum vel kalta ami, tunhnaia her lum mai nia an hriat thu sawiin, maxi cab chuan man to chhan chu thil man sang zelah lirthei part leh tuialhthei man a to zel vang niin an sawi.