Stamford Bridge-ah Lavia inpu lut

eason tharah tha zawka inlan tuma bazar nasa tak Chelsea chuan midfielder thar an nei leh ta a. Southampton midfielder Romeo Lavia chu manager thar Mouricio Pochettino hnuai player pakua an lak luhna turin zirtawpni khan an la lut.
Chelsea hian Romeo Lavia lak nan Southampton hnenah £53m an pe phawt a. A khelh that dan azirin £5m. an pek belh leh ang. Lavia hi bazar inhawng mekah midfielder ngaihven hlawh tak mai a ni a, EPL club lian Arsenal, Chelsea leh Liverpool ten lak tumin an inchuh hlawm. Arsenal in an ngaihven hmasa ber a, Rice an lak luh hnuin Gunners hian ngawih an chuh zui thung. Arsenal an ngawih hnuin Liverpool in an dawr a, Southampton nen an indawr thui hman viau. Lavia ber hian Reds aia Blues zawm a duh zawk vangin Stamford Bridge-ah a inpu lut ta a, Stamford Bridge-ah kum sarih cham turin contract a ziak.
Chelsea midfielder thar Romeo Lavia hian season liam ta khan inelna hrang hrangah Southampton vawi 34 a khel. Mimal takin khel tha viau thin naa, Southampton tlahniam tur a chhanhim zo lo thung.
Season liam taah 12-naa awm a, chhe taka season khar Chelsea hi an insingsa nasa viau. Manager thar Pochettino hnuaiah player thar pakua ngawt an la lut tawh a. Player pakua an lak thar lai hian player 12 ngawtin Stamford Bridge an chhuahsan ve thung.