StartUp Mission hub tlawh

StartUp Mission hub tlawh
Adviser to chief minister TBC Lalvenchhunga, MLA chuan Mizoram StartUp Mission (MSUM) hub a tlawh a, an hmunhma enin, office an kalpui dan a zawt a, thawktute nen an inkawm.
Mizoram Startup Mission hmalakna fakin an programme – ‘Kailawn’ leh ‘Rahbi’ chuan Mizo thalaite zingah nghawng tha tak a nei chho mek zel nia a hriat thu adviser to CM hian a sawi a. “Mizoten sumdawnna lama hma kan sawn theih loh chhan lian ber pakhat chu, kalphung fel vawn (formalization) lama kan pachhiat vang niin ka hria a; proprietorship bak pelh harsa kan ti thin. Tunhnaiah kan thalaiten private limited company din an uar ve tan a, hei hi hmasawnna hlu tak a ni,” a ti.
Heng thalaite hian Startup lama hma an sawn theihnan sawrkar chuan Venture Fund a ruahman a, tangkai takin an la chhawr chho ngeia an rin thu leh, entrepreneurs tha neih chu ramin a mamawh hle tih a sawi a ni
MSUM CEO Rinzuala chuan MSUM din a nih dan leh hma an lakna a sawifiah a. Mizoram Startup Mission an nih hmaa Planning department hnuaia Committee leh Cell anga kal thin a ni a, kum 2022 atanga MSUM tih hming pua society din a ni ta a, an tum ber chu – Startup Culture tha Mizorama a awm theihnana hma lak a ni tih a sawi a ni.