India sawrkarin Uniform Civil Code hman tuma hma a lak mekna chu Mizoram State Legislative Assembly chuan tha ti loin, a dodalna official resolution chu a pawm.
Thawhlehni Assembly Session neihah Home minister Lalchamliana chuan official resolution – “He House hian Uniform Civil Code dana siam tura hmalakna emaw rawtna emaw reng reng hi lungrual takin a do a ni” tih chu a pulut a. Tun dinhmunah India ramah hnam leh sakhaw hrang hrangten mahni puala dan leh kalphung kan neih angin inneih leh inthen te, ro khawm dah leh thurochhiahte, chhungkaw inenkawl dan leh ram neih dan phungte kan nei hrang thliah a; hengte hi dah bo vek a, tihdan inang vek hman hi Uniform Civil Code thil tum a ni, tiin a sawi.
India leh MNF inremnaah India Constitution Article 371G-ah Mizorama chengte humhalhna a awm chungin, India ram puma he dan hman hi thil tha ber a nih a rin loh thu leh Mizoram pawna Mizo awmte tan harsatna a siam tur thu Home minister hian a sawi a. India ram inpumkhatna atana thil tha lo leh inpumkhatna tichhe thei a nih thu a sawi bawk.
“India indan hlima dan siamtu pawl, Constituent Assembly-ah pawh Uniform Civil Code hman chungchang hi an lo rel tawh a. Rei tak an sawiho hnu-ah Constitution article 44-na, Directive Principles of State Policy-ah ziahlan a ni ta a. Directive principles hi thil tha leh duhthusam ziahkhawmna a ni a, a taka hmana kenkawh theih a ni,” Lalchamliana hian a ti.
Mizoram Rajya Sabha MP Pu K Vanlalvena’n Parliament-a a zawhna chhannaah, sawrkar laipuiin UCC hi hman tumin hma a la tih a tihchian bakah kum 2019 inthlanpuia BJP manifesto-ah pawh an thiltum zingah ziahlan a ni tih a sawi a ni.
Sawihonaah sawitu zing ami BJP member Dr BD Chakma chuan, Law Commission of India 21-na in UCC hi a tulna a awm loa, a tha hek lo, tiin a lo sawi tawh a. Hei vang hian hetianga state assembly-a lo buaipui chu hun loa a hriat thu leh sawrkar laipui lamah a dik lo zawnga a than mai a hlauhawm zawk thu a sawi a. Sawitu dangte chuan party nihna dahtha in, UCC hman a nih lohna tura lungrual taka do tlan an duh thu an sawi thung.
House leader, chief minister Zoramthanga chuan India ram chu leilung leh sik leh sa pawh inang lo tak tak, hnam chi hrang hrang inang lo tak tak leh hnam nunphung leh sakhaw hrang hrang biate chenna a nih avangin, UCC hi India ramah hman chi a ni lo tiin a sawi a ni.
Sawiho hnu ah speaker-in vote a laknaah he resolution hi lungrual taka pawm zui a ni.
State Assembly-in UCC hman tum dodalna a pawm
Get real time updates directly on you device, subscribe now.