State dang atangin Mizoramah lut hnem

Tun karah Mizoramah state dang atanga lut an pung a, ni tinin a za tel an lut. MZP ngaih a tha lo a, Vairengte leh Bairabi-ah an duty thin. ILP nei lova luh ruk tumte pawh an man nual.
Vairengte atanga thu dawn danin, August ni 18 khan ILP endikna hmun paltlangin mi 228 an lut a, ni 19-ah mi 535 an lut.
A hma chuan ni khatah mi 60-90 vel an lut tlangpui a, ni 18 atang hian an pung ta hluai a ni. Chumi hnuah pawh, Ningani thleng khan an la tam.
Ni 18 zing khaw var hmain ILP siamna hmunah hian intlar an thahnem a, nghah te a lo ngai a, an chumi lungawi lo chuan thawm an nei hial.
Bairabi-ah pawh Mizorama lut an pung a, ni 18 atanga ni 21 chawhnu dar 2.30 thleng khan ILP enna hmun paltlangin mi 780 an lut. A hma nena khaikhinin, tun kara lut zat hi a tam an ti.
Vairengte leh Bairabi-ah hian MZP-in ILP endikna hmun vel an thut chilh a, hnam dang Mizorama luh tum an pung thut hi ngaihthatthlak lo an tih avangin an duty a ni. Vairengte-ah chuan ILP nei lo, police awmna hela Mizorama luh tum mi 20 chuang an man tawh tih thu dawn a ni.
MZP hruaitute chuan Mizorama luh tumte hi an insawi danin, sipai laknaa intlar tur te, company hnathawk leh mistiri an ni tlangpui.
Tun kara Mizorama luh tumte hi zan lamah an tam a, zanlaiah pawh ri luih luih tham an awm thin