State dang Zohnahthlak tlingte chona atan hmang zawk ang u – Lalmuanpuia Punte

State dang Zohnahthlak tlingte
chona atan hmang zawk ang u
– Lalmuanpuia Punte
State danga Zohnahthlakten Mizoram leh sawrkar laipui hnuaia hna an hmuh chungchangah Mizoram thalaiten chona leh harhtharna atan hman a tul tih MLA Lalmuanpuia Punte chuan a sawi.
Thawhtannia ZPM office-a inkhawmah adviser to CM (Political) Lalmuanpuia Punte hian, MPSC-in Combined Competitive Exam result a tihchhuahah state dang mi Zohnahthlak a tling chu sawiselna thawm a ri nasa tih sawiin, political party tinin ‘Zohnahthlakte luah chin rorelna pakhata a awm theihna tura beih’ tih chu an thil tumah an dah vek avangin sawrkar kal tawhah pawh inhawng zau takin India ram chhunga Zohnahthlakte chu exam an phal thin a, an rawn exam a, an tling thin a, officer lal tak takte an lo awm tawh thin tih a sawi.
“Sawrkar kal tawhte lo inhawnna kha ZPM sawrkar pawhin a chhunzawm a. Pu Laldenga chief minister hlim phei kha chuan Pu Lala Khobung hi direct-in a lalut tawp a. Engineer-ah pawh Pu Zothangsanga, Power lamah Pu K Guite pawh direct-in Manipur ami kha a appoint tawp a ni. Chutih lai chuan engineer zir zo tawh, hna hmu lo khan an sawisel a, MNF sawrkar khan an ni kha kawmin, ‘Hei chu Zohnahthlak inpumkhatna atana kan tih, kan politics kawng kal zel tura pawimawh an ni a, lo thik lo hram rawh u,’ an ti a, an hrethiam mai. Tunhnaiah hetiang sawiselna a awm hian thalaiten ‘chonaah hman zawk tur,” a ti.
Zohnahthlak unaute, a bikin Manipur amite chu central-ah an exam nasa a, an tling nasa a, Delhi-ah ministry hrang hrangah Zohnahthlak Manipur chhuak an tam a, chu’ng mite chu Mizoram tana thahnem lo ngai em em thin an ni tih Lalmuanpuia Punte hian a sawi.