State danga hna zawng turin chah

State danga hna zawng turin chah
Zirlaite chu Mizoram chhungah chauh hna zawng loin sawrkar laipui hnuaia hna zawng thin turin adviser to chief minister Lalmuanpuia Punte chuan a chah.
Hrangturzo bialtu MLA Lalmuanpuia Punte hian kar kalta chhung khan a bial khaw hrang hrang a fang a. Sailulak High School Silver Jibilee lawmna hmanpuiin, Govt. N. Mualcheng Middle School Golden Jubilee a hmanpui bawk. Khawtlang mipui tanrualna avanga zirna in tha tak khuain an nei chu lawmawm a tih thu a sawi a. Rim taka thawktute tan chuan kawng engkimah hlawhtlinna a awm a, foreign-a hna thawka kalte hna thawhrim ang hi chuan Mizoramah pawh thawhrim chuan hlawhtlinna a awm tih a sawi. Zirlaite chu Mizoram chhung chauha sawrkar hna zawng loin, civil service tling phalo te pawhin Staff Selection Commission hnuaia hna exam a, state pawna sawrkar hna zawng thin turin a fuih bawk.
A bial chhung khaw hrang hranga kum 80 chin chunglam tan Krismas thilpekah puan nuam a pe a, E. Lungdar leh N. Vanlaiphai khua hnenah phul samna tur khawl (manual grass/ lawn mower) a pe a, Leng khua leh Piler khua futsal ground-a phah tur phul lem leh Leng khaw thirdeng tan pûm a pe a ni.
MLA hian Govt. E. Lungdar High School, Govt. E. Lungdar Middle School I & II leh Govt. E. Lungdar Primary School-I tlawhin school-in mamawh an thlen chu tih hlawhtlin a nih theihnan School Education minister hnenah theihtawp chhuah sak a tum tih a hrilh. Krismas hmanna tura thawhlawm leh fate thawmhnaw thar leina tur neilo mi harsate pualin inhlawhna MLA Fund atanga pein, party Block/Group/Unit hruaitute hnenah party feeling awm miah loin mi harsate inhlawh tir turin a hrilh a ni.