State khata mite kum hnih chuang intlawhpawh lo tawh

Manipur state-a Zo hnahthlakte leh Meitei-te an intihbuai avangin kum hnih chuang, kum thum dawn an intlawhpawh lo tawh a, state khata awm e ti lovin ral khata mi ang mai an ni.
May ni 3, 2023-ah an buai tan a, ralthuam nen an inbei zui. An intlawhpawh ta lo char char a, tun thlengin an la inkalpawh lo.
Zo hnahthlakte sawi danin, damdawi ina inentir kawngah a nghawng a, damdawi in tha awmna Imphal-ah an kal theih loh avangin, inentir turin Mizoramah an kal a, phaia an inentir dawn pawhin Mizoram lama an kual a ngai.
Anni aiin Meitei lam an buai zawkah an ngai a, thlawhna lo chuan Meitei hi an zin chhuak thei lo tluk a ni. Manipur pawnah motor-in an kal thei lo ang tluk a ni a, hei hian kawng hrang hrangin a nghawng ang an ti.
An buai bur bur tawh lo a, mahse hmun thenkhatah chuan tlangval an la duty. A vanglai chuan khaw tinah an duty a ni ber a, khaw tam zawk feah chuan duty an indah tawh lo.
Ni tin khawsak pawh a pangngai a, zirna in leh sorkar office a inhawn pangngai tawh bakah kohhrante pawh an kal dan ngaiin an kal.
An ralmuang tawh a, ni tin khawsak a pangngai tawh. Mahse an la intlawhpawh lo hian kawng hrang hrangin nghawng a nei.
Manipur hi President’s Rule-ah an awm mek a, hei hi a tawp hnai. February-a tawp mai tur a ni a, India sorkarin state sorkar thar din a tum mek. Chu chu tuna Manipur-a an titi ber a ni.
“February-ah sorkar thar a din loh chuan thla ruk chhunga inthlan a ngai dawn a. Chu ai chuan sorkar thar din hi India sorkar hian a duh a ni,” Zo hnahthlak hruaitu pakhat chuan a ti.
MLA ding laite hmangin India sorkar hian state sorkar dintir a tum a, Zo hnahthlak MLA-te ngaihdan hriat a ni rih lo.