State leh UT din champha lawm
State leh UT din champha lawm
‘Ek Bharat Shreshtha Bharat’ hmalakna hnuaiah Manipur, Meghalaya, Tripura, Uttar Pradesh bakah Dadra and Nagar Haveli & Daman and Diu-te an din champha chu Janusry 30 khan larsap Gen. Vijay Kumar Singh (Retd) hoin Lok Bhavan-ah lawm a ni.
Larsap chuan Prime minister hmalaknaa kalpui Ek Bharat Shreshtha Bharat chuan India ram hnam ziarang hausa tak chawilar a tum tih sawiin, “Kan kalna apiangah hnam ziarang leh nunphung midang hmuh theiha kan phochhuah a, keini pawhin an hnam ziarang leh nunphung kan zir hian inhriatpawh tawnna leh inunauna a siam a ni”, a ti.
India ram chu ram ropui leh zau tak a nih avangin a ram mipui zinga a tam zawkin midangte hnam ziarang leh nunphung an hrechiang lo fo thin a. Inpumkhat turin midangte hnam ziarang leh nunphung kan zaha kan hlut thiam a pawimawh hle tih a sawi. State hrang hrang leh union territory-te chanchin tawi chhinchhiah tlak tak tak sawiin, “Danglam viau mah ila, hei tak hi kan chakna hnar leh hmun khata min phuarkhawm tlattu a ni,” a ti a. State dang atanga Mizorama awmte leh Mizote chu midang hnam ziarang leh nunphung a tam thei ang ber zira inhriatpawh tawnna tha siam tum turin a chah.
Manipur larsap Ajay Kumar Bhalla, Meghalaya larsap CH Vijayashankar, Tripura larsap Indra Sena Reddy Nallu leh Uttar Pradesh larsap Anandiben Patel te thuchah bakah heng state leh UT-te chanchin tarlanna video thlirho a ni a. Manipur aiawhin RIPANS associate professor Dr Ch Sarakham Aimol leh Tripura aiawhin CVSc& AH assistant professor Dr Analisha Debbarma ten an state chanchin an sawi a. RIPANS leh Govt. Johnson College zirlaiten hnam lam an entir.
Manipur, Meghalaya leh Tripura hi 1972 January 21 khan North Eastern Region (Re-organisation) Act 1971 hmangin state puitlinga hlankai an ni a. Uttar Pradesh hi 1950 January 24 khan state-a puan niin, union territory pahnih Dadra & Nagar Haveli leh Daman & Diu hi 2020 January 26 khan UT pakhata chhunfin an ni.
Ek Bharat Shreshtha Bharat programme hian India rama state leh UT hrang hranga cheng hnam hrang hrang, hnam ziarang leh nunphung inang lo tak takte inkara inpawhna tha zawk siam leh an inkara inhriatthiam tawnna nasa zawk siam a tum a. He programme kaltlang hian India rama state leh UT-te din champha lawm thin niin, chu Mizoramah larsap kaihhruaiin June 2023 atang khan buatsaih a ni.