State lottery-ah minister lawk inrawlhna corruption a awm

Mizoram State Lottery-ah minister lawk leh sawrkar officer lian inrawlhna corruption a awm ngei nia an hriat chu mipui hnena sawifiah an phut tih Congress party chuan an sawi.
MPCC Media department chairman Lalremruata Renthlei chuan Mizoram state lottery kalpui dan chu a felfai avang leh mumal taka monitor a nih thin avangin India ram pumah hriat a hlawh a. Hetihlai hian tun kum 5 kalta atang erawh chuan corruption leh inrawkna hmanruaah changin, minister lawk thenkhat, sawrkar hnathawk lian leh private sumdawngte hlawknaah a chang zo ta em, tih theihin thil a kalkual nasa tih a sawi.
State lottery official-ten Supreme Court hmaa statement an pek atanga a landanin, Mizoram State Lotteries-in ni khata revenue a siam theih chu a tlem berah cheng nuai 20 niin, kum khatah Rs. 72,40,00,000 (vbch. 72 vel) a ni, tih a ni a. Chuti a nih chuan Mizoram sawrkarin kum 5 kalta chhungin Rs. 2,75,60,00,000 (vbch.275.60) a lalut thei anga chhut theih tihna a ni tih a sawi.
Hetih lai hian kum 5 kalta chhung khan Rs. 31,34,13,730 (vbch. 31.34) chiah state lottery hian a lalut tih sawiin, “Kum khata lottery hmanga sawrkar sumdawnna atanga cheng vbch. 72 chuang lalut thei tura chhut khan kum 5 chhungin vbch. 31 awrh a lalut a. Kum khat chhunga lakluh theih zat chanve vel MNF sawrkar kum 5 chhung hian a lalut tihna a ni,” a ti.
Mizoram sawrkar leh distributor-te inkara inremna (agreement) anga kalpui a nih chuan, sawrkar hian kum 5 kalta chhung khan Rs. 2,57,81,52,623 (vbch. 275.60) a lalut tura chhut a nih laiin, thil tih chingpen vanga state sawrkarin sum a hloh chu Rs. 226,47,37,893 (vbch. 226.47) ang vela chhut theih a ni tih MPCC Media chairman hian a sawi a ni.
Mizoram sawrkar hian M/s Skill Lotto Solution leh M/s BS Enterprise nena inremna an siam chu a titawp (terminate) a, heng company ngai vek hi a hmaa an inremna aia rate hniam zawkin inremna a ziahpui leh tih sawiin, “Heng kan tarlan atang hian minister lawk, sawrkar hnathawk lian thenkhat leh private sumdawng i.e. Skill Lotto Solution Pvt. Ltd. leh BS Enterprise te hi a ruka thawk hoin, Mizoram sawrkar sum bawma sum lut tur an lo paipawn em ni? Heng atang hian tute nge hlawkna tel tih hi mipuiin an hriatfiah ngei theihnan sawifiahna felfai tak kan phut a ni,” a ti.
Sawrkar awmze nei leh kalphung felfai zawk a din theihna turin Congress party chuan Pu Lalsawta kaihhruaina hnuaiah ruahmanna fel tak an siam tih a sawi a. Pathian leh mipui zara sawrkarna fawng chelhtu an nih theihna tur leh ramin harsatna khirhkhan tak tak a tawh mekte chinfel a nih theih nan Zoram mipui thawhpui atan an sawm tih a sawi a ni.