State pahnih inbiakna in rah tha a chhuah ka ring – Home minister

Assam sawrkar nena ramri chungchanga an inbiak lehna tur chuan engemaw tala rah tha a chhuah ngei a beisei tih Home minister K Sapdanga chuan a sawi.
Amah kawmtu thuthar thehdarhtu thenkhat zawhna chhangin Home minister chuan, Assam Home secretary chuan tunhnai khan Mizoram Home secretary hnenah state pahnih chief minister-te lo inbiak tawhna bawhzuiin inbe tura rawn zin a rem leh rem loh a rawn zawt a, hrilh a nih hnu ah chief minister an rawn leh a, a ni pawhin inbiak tha a tih avangin inbiak an remchan thu an zuk hriattir tih a sawi.
Kumin February-a state pahnih chief minister an inkawm tumin, Assam CM-in ramri chungchangah Border Protection & Development minister rawn tirh thuai a tum thu a lo sawi tawh tih K Sapdanga hian a sawi a. MP inthlanah model code of conduct (MCC) avangin a rawn kal lawk thei lo a. MCC zawh hnuah an rawn bawhzui ta a, kumin August 9-ah inbiak tum a ni tih a sawi.
“Eng anga thuiin nge hmasawnna a thlen ang tih kan hre loa, hmasawnna erawh a awm ngei kan beisei. Memorandum an rawn neih a rinawm a, keini pawhin memorandum kan lo nei dawn. Sawrkar kalta thuken pawh ken chhunzawm zel chin a awm ang,” a ti.
Ramri chungchanga Mizoram sawrkar dinna chu, sawrkar tawhte dinna – Bengal Eastern Frontier Regulation (BEFR) 1875 thokha a ni dawn tih a sawi a. Ramria chengten buaina an tawh tawh lohna’n tharum zawng ni loin, dawhkana chinfel tumin theihtawp an chhuah zel dawn tih a sawi. An sawrkar hnuah ramriah status quo bawhchhiatna thar a la awm lo nia an hriat thu a sawi bawk.
Home minister sawi danin, inbiakna bawhzuia Mizoram sawrkarin Assam sawrkar enkawl zinga khaw 62 chu Mizoram chhung a nih thu Assam sawrkarah an thlen tawh a, chhanna an la dawng lo. Hei hi tun tum inbiaknaah pawh sawi chhuah a ni dawn. Inbiak zawhah state pahnih minister-ten joint press conference nei nghalin, an inbiakna tlangpui an sawi dawn a ni.