State phuttu Ladakh aiawh leh sorkar laipui inbia

State phuttu Ladakh aiawh leh sorkar laipui inbia
Ladakh hruaitute leh union home ministry aiawhte chu Delhi-ah Nilaini khan sub-committee level-a inbiain hei hi state nihna neih duhtute leh sorkar laipuite an inbiakna hmasa ber a ni.
Thla hmasaa Ladakh-a chengten state neih an duhna lantira an punkhawmnaah khan tharum thawhna thlengin police-in mi pali an kap hlum a, mi dang tam takin hliam an tuar bawk.
Mipui huikhawmtu ber, educationist Sonam Wangchuk-a chu National Security Act (NSA) tlawhchhana man zui niin Jodhpur Central Jail-ah dah mek a ni.
An inbiaknaah hian Ladakh aiawhtute chuan sorkar laka thil phutna lantirnaa a hnaikaitu bera ngaih, Wangchuk-a telin an hruaitu man mekte rang taka chhuah an duh thu an thlen.
Leh Apex Body (LAB) leh Kargil Democratic Alliance (KDA) hruaitute hian tharum thawhna thlenga thi chhungte hnenah an phu tawk zangnadawmna pek ngei an duh thu an thlen bawk.
Nilainia inbiaknaah hian thil tam tak sawi a ni lo va, a vawi hnih nan kar thara inbiak leh an tum.
Sorkar laipui, LAB leh KDA indawrna hi a hma pawhin kalpui tawh a ni a, Leh-a September 24-a buaina a chhuah hnuah chhunzawm a ni ta lo va. Ladakh-a pawl lian tak pahnih hian home ministry-in October 6-a inbe tura ruahmanna a siam chu an pawm duh lo a ni.
Ministry hian tharum thawhna thleng khan Supreme Court judge chawlh tawh kaihhruaia chhui nghal a nih thu an puang a. Tha thara inbiaa a sawm leh hnuah inbiak hi chhunzawm leh a ni bawk.
“Vawiin inbiakna hi boruak tha tak hnuaiah zau lem lo taka kalpui a ni a, kan indawr leh thuai dawn a, kar thar lamah a nih a rinawm,” tiin LAB-a co-convener Chering Dorjay-a chuan a sawi.
Tun tum inbiakna neih hmaa an inbiak hnuhnung ber chu May thla daih tawh kha a ni.
Nilainia inbiaknaa tel, Ladakh Lok Sabha MP Mohmad Haneefa-a chuan Ladakhi hruaitute hian Ladakh-in state nihna a neih theih an duh thu leh a chhan, an thatpui dan tur chu inhawng takin an sawi niin a sawi a. “Sonam Wangchuk-a telin September 24 leh a hnua mi mantepawh chhuah thuai kan duh thu pawh tlang takin kan sawi a ni,” tiin inbiak zawh hnua thuthar lakhawmtuten an kawmnaah a sawi.
NSA tlawhchhana mi mante hi an chung thu rel lohvin thla 12 thleng hren theih an ni a, chutih rual chuan a ai hma pawhin thubuai hi hlihsak theih an ni.
KDA aiawha inbiaknaa tel, Sajjad Kargili-a chuan Ladakh mipuiten rang taka an hruaitu man chhuah leh thite zagnadawmna pek an phut tih a sawi a. “Kan thil phutte hi sorkar pawhin kan duh dan ang ngeia min chhan kan beisei,” a ti.