State sawrkar sum ni lo, a bak sum dang kan haichhuah pui ang che u – Dr R Lalthangliana

State sawrkar sum ni lo, a bak sum dang kan haichhuah pui ang che u
– Dr R Lalthangliana
Sinlung Hills Council inthlanah MNF leh a thawhpui HPC(R) thlantlin an nih chuan state sawrkar atanga sum an dawn tur bak hmun dang atangin hmasawnna tur sum an haichhuah pui dawn tih MNF senior vice president Dr R Lalthangliana chuan a sawi.
Sinlung Hills Council (SHC) inthlan tura khaw hrang hranga campaign mek MNF hruaitu hian, autonomous council chu India dan angin mahnia ro inrelna fel tak nei niin, state sawrkarin duh duha a chinpawr theih a ni lo tih a sawi. Sawrkarna an siam a nih chuan an enpui zel anga, sum leh pai hmalakna kawng hrang hrangah an vilpui zel dawn tih a sawi bawk.
“SHC budget piahlamah state sawrkar kaltlang ngai kher loin special project liantham tak tak kan siampui che u anga, thil lian tak tak tih dan kan hria a, hma kan la dawn a ni. Council a zahawm a, a budget hi autonomous a nih angin, state sawrkarin sum hreka tih buai chi a ni loa, danin a phal lo. In budget let engemawzat kan hai chhuahpui dawn che u a ni,” a ti.
Health minister a nih lai khan Zoram Medical College-ah state sawrkar sum hmang loin hmasawnna hna thawhna tur sum tam tak, a pawtlut tih Dr R Lalthangliana hian a sawi a. Champhai, Serchhip leh Kolasib-ah hospital lian dinna atan cheng nuai 2000 man vel theuh, Mamit damdawi inah khum 100 awm theihna cheng nuai 1700 man state sawrkar sum hmang loin a hai chhuak tih a sawi. Heng lo pawh hi state sawrkar sum hmang loin hmun hrang hrangah hmasawnna hna liantham tak tak an thawk tam hle niin a sawi bawk.
Corporate social responsibility atang pawhin council thuneihna hmangin sum pawhchhuah dan an hria a, helai bialah hian heng zawng zawng an tih theihna tur chuan an candidate-te thlantlin ngei ngei a tul tih MNF senior vice president hian a sawi a ni.