State sum che vel ‘nghawng’ pha…

Mizoram Youth Commisssion chairman chuan MYC kaltlangin Mizo thalai 170-in kum 2024-2025 chhungin hna an hmu tawh a, ram pawna hnathawkte hlawh hian Mizorama sum che vel pawh a nghawng pha a, kan sum lakluh tipungtu pakhat a ni, tiin a sawi a.
‘Nghawng’ tih tawngkam hi a tha lo zawnga rilru khawih, hreawm tihna lam kawk deuh mah ni se, ‘mumal lo’ kan ti ‘mumal’ ta ang tho hian, a tha lam sawinaah pawh hmang ta mai ila, Mizo tawng bungrua tihausatu a ni zel tawh mai ang chu.
Sawrkar (Mizoram Youth Commisssion) hmalakna hnuaia kum khat chhunga ram pawn (state pawn)-a thalai hetiang zat hna thawka an chhuak ve thei ta hi thil lawmawm tak a ni hrim hrim a. |halai hetiang zatin kum tin hna an hmu thei a nih chuan, kan hma lam hun hi a eng chho zel dawn tihna a ni awm e.
Chutih rual chuan, thahnem kan ngaih luatah hian, duh thawh taka thu han sawi mai hi thil awl tak a nih a rinawm. Hna thawka state pawn lama thalai hetiang zat thawk ta chuan, an chhungte pawisa an rawn thawn ve ngei ang a, sum lakluh tipungtu pakhat chu a ni chiang mai a; chutih laiin, Mizoram chhung sum che vel nghawng pha ang hial sawi erawh hi chu, hmasawnna sawi vawng kan tum lutuk a ni thei em? Kan hmanhmawh lutuk a ni thei mai ang em? tih erawh ngaihtuah theih tak a ni awm e.
India ram state zingah chuan Kerala khu ram pawna thalai hnathawk (skilled & unskilled) thawn chhuak tam ber an ni hial awm e. Tun dinhmunah khawvel ram hrang hrang 182-a hnathawka awm mek hi mi nuai 4.36 chuang an ni a, UAE, Saudi Arabia leh Qatar-ah te an tam deuh ber. Ram pawna hnathawka awm mek ten kum khat chhunga Kerala state chhunga sum an rawn thawn luh hi cheng vaibelchhe nuaikhat chuang te a ni a, GSDP-ah contribution an nei sâng hle dawn tih a lang chiang a. Kerala state chhung sum che vel pawh a ‘nghawng’ pha viau ang le.
Tuna state pawna kan thalai hnathawka chhuakte hi Mizoram population atanga chhut chuan 0.01% an ni a, a chhungkua ang zawnga chhutin, chhungkua nuai 2.5 awm anga chhutin, 0.06% vel an ni ve thung a. State sum che vel a nghawng han tih tham a nih te phei chuan a lawmawm hlei hlei ang a, a technical report chipchiar deuh zawk pawh mipui hriat tura puanzar law law a tha awm asin.