State thenkhatah Covid kai pung mah se ‘engkim thunun’

State thenkhatah Covid kai pung mah se ‘engkim thunun’
Tun hnaiah Asia khawmualpui ram thenkhatah Covid kai hmuh an pung leh deuh va, India-ah pawh state tlem azawngah hetiang dinhmun hi ni mah se thuneitute chuan ‘engkim thunun’ a nih thu an sawi.
News agency ANI chuan Covid-19 hi Singapore, Hong Kong leh Thailand-ah chawlhkar tam vak lo liam ta atang khan a kai hmuh an pung leh niin a tar lang a. India-ah pawh state thenkhatah hmuh a pun hret avangin National Centre for Disease Control (NCDC), Emergency Medical Relief (EMR) division, Disaster Management Cell, Indian Council of Medical Research (ICMR) leh sorkar laipuii hnuaia damdawi in ten an sawiho tawh.
“Tuna kan hriat theih chinah chuan a kaite tawrh dan hi a nep rih hle a, na tak leh thihna thlen khawp a awm rih lo,” tiin hre chiangtute chuan an sawi.
Agency hrang hranga mi thiamten India dinhmun an thlirnaah hian ‘engkim thunun vek’ a la ni tih an sawi a. Thawhtanni thlenga hri kai hmuh punna chu hetiang zat mihring chenna ramah chuan ‘a la hniam hle’ tih a ni rih bawk.
“Dinhmun thar thlir hian Director General of Health Services (DGHS) kaihhruaiin NCDC, EMR division, Disaster Management Cell, ICMR-a mi thiam leh sorkar laipui damdawi inte an thukhawm a. India-a Covid-19 dinhmun hi thunun a ni a. May 19, 2025 thleng khan hri kai mek hi 257 an awm a, hetiang zat mihring chenna ramah chuan a la tlem hle a ni,” tiin sorkar hotute chuan an sawi.
Hri la kaia enkawl mekte pawh hi an nat dan a na tham lo va, damdawi ina awm ngai pawh an awm lo niin an sawi bawk.
Covid-19 hi Asia chhimchhak lam ram – Hong Kong leh Singapore atanga Thailand thlengin a kai hmuh an pung leh hret a. Heng kai tharte kai ber hi Omicron variant JN.1 niin Singapore-ah chuan May thla tirah khan a kai hmuh hi 14,000 chuang an awm a, Hong Kong leh Thailand-ah hmuh an pung viau bawk.
JN.1 chi pek hi August, 2023 khan hmuh chhuah niin World Health Organisation (WHO) chuan ‘ngaihven ngai’ huangah December, 2023 khan a dah a. He chi bik hi Omicron BA.2.86 chi peng atanga peng leh chhawng a ni.
JN.1 hi vawi 30 chuang insiam danglam tawh niin WHO chuan a sawi a. Tun hnaia kaite kai zingah hian chi peng dang, LF.7 leh NB.1.8 an awm nual bawk niin mi thiamte chuan an sawi.