State tin fang chhuaktuin Mizoram pan mek
Boruak a thianghlim theih nana tanlak a tul thu aupuia thirsakawr hmanga India ram state zawng zawng fang chhuaktu Vanlallawmzuala Varte-in Mizoram a pan mek.
LZ-a tia koh Vanlallawmzuala Varte hian October ni 22 tlaiah khan Manipur-a Mao khua a thleng a, tihian thirsakawrin state zawng zawng a tlawh chhuak ta. Mao hi Kohima atangin a kal a, Mao atang chuan Kohima-ah a let leh a ni.
Kohima atang hian Mizoram panin a chhuak leh a, Dimapur-ah riak phawtin, chuta tang chuan Diphu a pan leh a ni.
A state tlawh hnuhnun ber atang hian thirsakawr hmang bawkin zin kawng bul a tanna Aizawl a pan leh a, hei hi record a siamna turah a ngaih vang a ni.
Zirtawpni zanah khan Diphu-ah a riak a, Inrinni-ah Diphu hi chhuahsan a tum. November ni 5-a Aizawl tlan thlen a tum a ni.
‘Ride to clean air’ tih thupui kenga state zawng zawng leh UT thenkhat tlawhtu LZ-ah hian a zinna hmun hrang hrangah a beisei phak bakin miin an lo lawmin an lo dawngsawng tha tih a sawi a, Kohima atanga Mizoram a pan kawngah pawh a beisei phak bakin miin an lo lawm tih a sawi.
Dimapur-ah hian an sikul lian Living Stone School-ah thu an lo sawitir a, Inrinni a nih avanga sikul chawlh ni mah se hostel naupangte hmaah kan chenna khawvel leh boruak a thianghlim theih nana theihtawp chhuah a tul thu a sawi a ni.
Zirlaite chauh ni lovin Dimapur-ah hian chanchinbumite’n a thusawi hi an ngaithla a ni. State hrang hrangah chanchinbumite’n kawmin a zin chhan an chhuah thin a, mipuiin an lo ngaihlu thei hle.
Miin thilpek an pe sup sup a, kawng lakah lo tidingin chhang te, eitur chi dang te, pawisa te an lo pe thin. Jharkhand-ah phei chuan thusawi leh lemziak intihsiakah endiktuah an lo tantir a, hemi an tan hma hian pawnah mipuiin thla an lakpui nasat avangin a huaihawttute’n in chhungah an luhpui tawp a ni.
Nagaland-ah hian Mizote’n an lo buaipui a, state dangah pawh Mizote’n an lo mikhual thin.
Kohima atanga Diphu a thlen hian km 115 vel a inkhalh leh tihna a ni a, Mao khua a thlen khan km 16350 vel a inkhalh tawh bawk. Aizawl a thlen hian km 17026.93 vel thirsakawrin a tlan dawn tihna a ni.
A chau lem lo tih a sawi a, “Ka chau hran lo, zan ka mut that chuan ka pangngai leh mai,” LZ-a chuan a ti.