State University din tumnaah college pali sawikhawm tum
State University din tumnaah college pali sawikhawm tum
Mizoram State University din tumnaah a thara ruahman tum loin, college ding sa pali vel sawikhawmin ‘cluster university’ neia din tum a ni.
State university din tuma bawhzui chho mekah a kaihhnawihte chu Nilaini khan Higher & Technical Education minister Dr Vanlalthlana hoin an inrawnkhawm a. ‘Draft Mizoram State University Bill’ thlirhonaah hian H&TE official-te, Mizoram College Teachers’ Association aiawh leh state sawrkar hnuaia college thlan bik atangin principal leh faculty member-te an tel.
Inrawnkhawmnaah hian draft bill-a sawihoin zawhna awmte chhan a ni a, sawifiah ngai sawifiah a ni bawk. Draft Mizoram State University Bill hi Assembly House-a put luh theih turin cabinet thutkhawma thlirho tura chhawp chhuah a ni ang.
Tun dinhmunah state university din tura ruahmanna atan hian Bill Drafting Committee leh Study Team din a ni tawh a; Study Team hian Cluster University of Srinagar leh Cluster University of Jammu kal dan zirchiangin Bill Drafting Committee thlirho turin an thehlut tawh. Draft bill hi Finance department leh Law & Judicial department nen pawh H&TE minister kaihhruaiin an enho tawh bawk.
Draft Mizoram State University Bill-ah hian Mizoram state university chu post graduate programme zirna tura ruahman a nih bakah multidisciplinary leh research-oriented institute ni tura duan a ni a. Hemi tur hian ram luah tur en thlithlai tan niin, state-in resource a neihsa zirchian mek a ni.
A bul atanga state university thar hlak din a hautak dawn avangin, state college thlan bik pali sawikhawmin cluster university neia Mizoram State University hi din tura ruahman a ni.
National Education Policy 2020 chuan state university la nei lote chu kum 15 chhunga din turin a beisei a. Tun dinhmuna Mizoramin a hrana state university a neih loh avang leh, a awmsa Mizoram University leh ICFAI chu central university leh private university a nih avangin NEP 2020 duh danin Mizoram sawrkar chuan ke a pen a ngai a. Mizoram State University hi din a nih chuan tuna state sawrkar hnuaia college-te chu state university hian a enkawl tawh dawn a ni.