State University inrelbawlna inpui tur Aizawl Luangmual
Mizoram State University din tumin sawkarin hma a la a, administrative building chu Luangmual Aizawlah sak tum a ni tih chief minister Lalduhoma chuan a sawi.Thawhtannia Govt Aizawl College-in an college kum 50 tlin an lawm a hmanpuinaah chief minister chuan, State University din tumin hma an la a, kum 2036 hmaa neihfel hman an tum a. Administrative building hi Luangmuala sak an tum a, a bul lo tantu tur thawktu pawh an lak thuai a rinawm tih a sawi a ni.
NIT Mizoram campus chu Lengpuiah kum 2009 khan sak tan a ni a. Forest clearance nei loa sak a nih avangin kum 2017-ah hna zawng zawng tihtawp niin, cheng vaibelchhe 20 chuang chawi tura tih an ni zui a. Mizoram tana NIT hlutzia an hriat avangin an sawrkar veleh an umzui a. Central-ah an lei chawi tur hi ngaihdam an dil a, vbch.10 chuang an ngaidam a. A bak kan pek tur chu an pe thuai a, campus sak hna hi chhunzawm theih a ni leh dawn ta tih a sawi bawk.
Assistant professor qualify lo engemaw zat lak an lo ni tih chief minister hian sawiin, “Qualify vek turin sawrkarin vawi tam chance a pe tawh chungin, la qualify lo 31 vel an la awm. An zinga 10 vel court-ah an kal a, court thutlukna kan ngaichang mek,” a ti.
Sawrkar hna lak danah an fimkhur tih a sawi a. National Health Mission hnuaia hnathawktu pawl pakhat chuan sawrkar hna lak thar turah an tana reservation siam turin sawrkar an ngen a. Nimahse, lak an nih dan an han zirchianin, India danpui kalha lak an lo ni tih a sawi. “Keini’n lo dah nghet ta ila, miin court-ah min khing se, kan tla sa a ni. Lainatin duhsak em em mah ila, an dilna hi kan ‘aw’ ngam ta lo a ni,” a ti.
Ziak leh chhiar thiam tamna state ni chungin, India rama institution tha ber bera lut thei tam lamah leh national level competitive exam-ah kan la hniam a, kan tribal-pui zingah tluk loh kan la ngah hle tih chief minister hian sawiin, “Tuna GAC zirlai hian he kan mutan hi rawn kheng thla ang che u,” a ti.
CM thusawi dang leh GAC chanchin:
8 Mizoram Engineering College, Lunglei Pukpui ami chu sawrkarin function-tir a tum a. 2026 academic year atanga zirna tan tumin thawktu thar mi 63 lak an ni dawn.
8 Mizoram Polytechnic Lunglei chu a ram neitute phalna la loa sak a lo ni a, he harsatna hi chinfel duhin sawrkarin hma a la mek.
8 Tunhnaia Mizoram Police constable 259 an lak thar chu a buaipuitu police officer hoin ‘Mizorama police lak tawh zawng zawngah a la fair ber’ an tih ngat a ni.
8 Thalaite tan sawrkarin remchang a siam hnem tawh a. Nikumah casual teacher 1369 lak an ni a, police constable 259 an la a, post hniam lam lak thar tam tak a awm bawk. Tunah health worker tam tham tak an la leh dawn a. Officer recruitment a kal reng a, MPSC calendar a khat hle.
8 PM USHA hnuaia Gender Inclusion & Equity Initiative component tangin Aizawl leh Lunglei district-a sawrkar college tan cheng vaibelchhe 10 Mizoram sawrkarin a dawng a. Aizawla college 8 tan works bikah nuai 625 dah a ni. GAC-in nuai 90 vel a chang a, tender chhuah mek a ni.
8 GAC Foundation Day-ah hian an college atanga zir chhuak leh college faculty zinga MLA leh minister lo ni tawh leh ni mek mi 26 leh principal lo ni tawh mi 13 chawimawina hlan an ni.
8 GAC hi kum 1975-a din a ni a, kum 1989-ah sawrkarin a la. Tunah BA, BCom leh MA Education zirna awmin, Mizoram sawrkar college zinga zirlai ngah ber a ni a, 1944 an awm mek.