FIFA World Cup qualifiers-a India senior men’s national team a tlakpui hnuah All India Football Federation (AIFF) chuan chawlhtir chak et et chunga contract an ziahpui dan avanga an petchhuah mai ngam loh head coach Igor Stimac chu Thawhtanni khan an ban ta nge nge a, mahse, inremna an lo ziahpui tawh angin a hlawh tur cheng vaibelchhe thum vel ngawt (USD 360,000) zet an pek a ngai dawn!
Stimac hi kum 2019 khan head coach atan sengluh niin, nikum October thla khan kum 2026 thleng ruai zui turin contract an pawtsei a, mahse, a hnuaiah India-in tlakhniam lam an pan zel a, ban chak ngawih ngawih mah se an ban avanga sumfai an pek tur tam lutuk ngaingam loin an ip hram hram a, chhe zeta FIFA World Cup 2026 qualification campaign a zawhpui leh tak hnu chuan duhthlan tur dang an nei ta ngang lo niin a lang!
Tunhnai kum chhoah AIFF hian fund hmuh kawngah harsatna a tawk a, kuminah phei chuan competition budget pawh an tihniam hial a, heti chung hian kum 55 mi ban kawngah member-te an lungrual tih AIFF thuchhuah chuan a tarlang a, head coach thar hnuaia hmalam an pan leh ngei theih an beisei thu an tarlang tel nghal.
Captain kumhlun Sunil Chhetri chawlh hnu chiah khan India chuan history thar siama World Cup Qualifiers third round luh theihna hun remchang nei mah se June ni 11 khan mualneitu Qatar lakah 1-2-a tlawmin an tum ram an thleng zo lo a, AIFF vice president NA Haris hoa thukhawm chuan Stimac ban turin thutlukna an siam ta a ni.
1998 World Cup semi-final lut Croatia team-a tel Stimac hian English coach Stephen Constantine thlakin Blue Tigers a enkawl a; a hnuaiah India chuan trophy lian pali la hmanin, chu’ngte chu SAFF Championship pahnih, Intercontinental Cup pakhat leh Tri-Nations Series title a ni.
India-in world cup khelh phak ve a tumna kawngah Stimac-ho hian qualifiers-ah an chetha ta tlat lo a, March thla khan ranking-a an aia hniam zawk leh mikhual chan chang Afghanistan an tlawm a, kha ta tang khan an head coach dinhmun a nghing tan ta a ni.
Croat chhiatna belhchhah turin Qatar-a AFC Asian Cup hnuhnung berah khan match thumah vawithum an tlawm a, goal thum an chhuah laiin goal khat mah an khung zo lo.
World Cup Qualifiers-in a dinhmun a hril zui leh a, second round first leg-ah sikhat faiin Kuwait an hneh a, beiseina an neihsan hman laiin Qatar lakah sithum faiin an tlawm a, chutah chak mamawh em em chungin Saudi Arabia rama neutral venue-ah goal awm loin an group-a team nem ber tura ngaih Afghanistan an inhnehtawkpui ringawt.
A hnuah Afghanistan nen hian Guwahati-ah intum lehin, 1-2-in mualneitu team an tlawm a; kumina qualifiers match li an khelhah point hnih chauh hmuin, heti zat game-ah hian goal hnih chiah an khung bawk a, Indian football lungawilohna a puakkeh a ni ta ber a, AIFF pawhin sum an chawi thlawn tur ui phal loin Stimac an ban ta nge nge a ni.
Igor Stimac-a hnuaiah India hian kum 2019 khan an match hmasaberah 3-1-in hriat hlawh lo Curacao an hneh lo nghal pang a, a hoa match 53 an khelhah vawi 19 chakin, vawi 20 an tlawm a, draw vawi 14 an nei.
Stimac an ban ta nge nge
Get real time updates directly on you device, subscribe now.
Prev Post
Next Post