Stray Kids-in No.1 pali an nei ta

On Nov 22, 2023 14 0

Stray Kids chuan Billboard 200 (albums) chart-a No.1 kai thei album pali an nei tling ta, an album thar ROCK-STAR chu chart No.1-ah a debut a, hetihrual hian Chris Stapleton leh Chris Brown te pawh chart top 10-ah an lang.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album a hla mal hralhna atanga album tlukpui te belhkhawm thin a ni.
Stray Kids ‘ROCK-STAR’ hi kar khat chhungin 2,24,000 an hralh thei a, chung zinga 2,13,000 chu album tak tak hralhna niin, streaming atangin 11,000 a tling thei bawk. Stray Kids album pali te hi No.1-a an la debut thei vek a, 2022-ah an album MAXIDENT leh ODDINARY te chu No.1-ah debut-in, kuminah ‘5-STAR’ album an lo No.1 pui tawh bawk.
ROCK-STAR album-a hla te hi Korean deuh vek an ni a, sap hla ni lo deuh vek awmna album he chart-a No.1 thei 22-na niin, kuminah chuan a parukna a ni.
Taylor Swift ‘1989 (Taylor’s Version)’ chu 1,59,000 hralh lehin No.1 atangin No.2-ah a tawlh ve ta bawk. He chart-ah hian kar hnih a No.1 hman a ni.
Chris Stapleton album thar ‘Higher’ chu 90,500 hralhin No.3-ah a debut a, he chart-a a album top 5 kai thei pangana a ni.
Chart No.1 hlui Drake ‘For All the Dogs’ chu 72,000 hralh lehin No.3 atangin No.4-ah a tawlh a, chart No.1 hlui tho Morgan Wallen ‘One Thing at a Time’ chu No.4 atangin No.5-ah a tawlh a, Jung Kook ‘Golden’ chu 56,000 hralh lehin No.2 atangin No.6-ah a tawlh a, chart No.1 hlui Taylor Swift ‘Midnights’ chu 52,000 hralh lehin No.9 atangin No.7 a kai thar leh a, chart No.1 hlui bawk Bad Bunny ‘Nadie Sabe Lo Que Va a Pasar Manana’ chu 49,000 hralh lehin No.5 atangin No.8-ah a tawlh ta bawk.
Chris Brown album thar ’11:11′ chu 45,000 hralhin No.9-ah a debut a, he chart-a a album top 10-a lang thei 12-na a ni.
Chart top 10 khartu chu chart No.1 hlui Zach Bryan self titled album ‘Zach Bryan’ niin, 45,000 hralh lehin No.8 atangin No.10-ah a tawlh ta a ni.