SUAL DO

K.Hmingthankaia

Lamlian tlangdung, City heart leh hmun hulum ualau lai vela, chhun khaw-en laia a huhoa inkawmhlim paha Sual do a awmkhawm hi a that rualin, heng hmuna mi awm tha duh lo inlar thinte hian tawmbuk, inhmuhkhawmna leh inhnangfakna, Vengchhung lamah zalen taka an inhmuhkhawm theihna an nei fir fer zel a, hei hi sual bawm bul leh sual than len zelna, sual tih zalenna bul a ni thin.
Chutiang hmun chu chhun lam leh zan, mi nawlpui men lai chuan a reh thap thin a, kawngka pawh an hawng ngai meuh lo. Mahse, zan dar 12 vel atangin kawngka an hawng tan a, zing khawvar chian hma thlengin, khawi khawi lam mi emaw hi khawi khawi emaw atang hian, a hmei a pa-in, naupang tak tak thleng hian an lutin an inchhuah chhawk zut thin a ni. Thawm an dim ngai si lo, a bul vel amite tan a ninawm duh em em a ni. Ninawm mai ni lovin, thil pawi leh thil bo a awm hlau reng rengin kan awm thin.
A bul hnai amite hian han tichiam dawn ila, thenawm khawveng inhmuhthiamlohna lianpui leh, intihbuai hrepa inhmelmakna a thleng mai dawn si. Vengchhung hruaitute lah chu han hrilh mah ila, a bul hnaia awm, a tuartu an nih ve loh chuan eng teh vakah mah an ngai duh si lo, Police hnena report ngawt theih pawh chu a ni mang si lova, hetiang In awmna bula awmte tan a hreawm duh khawp mai.
Hetiang mite hi thenawm khawvengte leh mimal anga ti lovin, khawtlang leh Pawl hmalaknaa thlithlaia, vena, zilh action lak tur chi ni-awm tak a ni.
Kan Veng, Venghlui Khuangchera Section, Lamhnai Tuikhur area-ah pawh hian chutiang hmun chu a awm a. Veng hruaitute pawh ka hrilh tawh, Police lo hrilh rawh min ti mai. Vawikhat chu chu In neitu pa ber hova kan kawtkai vela an rui khawsa luai luai chuan, kan naute kan In atanga chhuak thla chu kut an lo thlaka, ka zuk hau chu an Pa ber ho chuan kut min lo thlak rawn a ni. Hemi tum pawh hian thenawm khawveng kan intina lutuk ang tih hlauvin, kan Local Council Chairman chu ka phone a, vawi engemaw zat ka phone hnu, hun engemawti hnu chuan, Police lo hrilh mai rawh min tih angin, Police pawh vawi tam tak ka phone hnuin an lo kal ta a.
Police ho hnenah chuan, zilh leh vau deuh hleka kalsan leh mai tura kan intih lai chuan, a In neitu pa ber chu a chapo em avangin Thana lamah an la ta a. A hnu deuhah kei pawh Police Station-ah ka han kal a, Case siamsak lova, zilh leh vaukhan chunga a tuka rawn chhuah leh mai turin kan ti tlang a. Police pawhin Bond kan sign tir thlap ang an ti a, a tukah chuan a lo haw ve leh mai reng a.
Chawhnu lam deuha a ruih leh tawh hnu chuan an pafa-in kan inah lo kalin, ngaihdam ka dil e rawn ti si khan, “Min ngaihdam theih loh chuan min mantir leh mai rawh” te a la rawn ti ta zel a. Kei chuan, “A hranpain kan haw lo che, inhaw tur pawh kan awm lo, mahse, i inchhung enkawl dan hi fimkhur la, nangmah hi zahtlakin awm rawh” ka ti a. Ani lah chuan, “Min ngaidam thei em, mawh, min ngaidam thei em, min ngaihdam theih loh chuan mi mantir leh mai rawh” a la ti sek maia. Ka ngei lutuk chuan, “Ngaihdam dil zawng zawngah chuan i la chapo ber ang, haw rawh,” ka ti ta ngawt mai a ni.
Hemi hnu hian kan ral leh lam Pu Hanga Colony ami Bike chu zing khawvar hma deuhin a bova, chumi tum chuan a fapa hi CCTV-ah hmuh a ni awm e. Kan area Lamhnai Welfare pawhin vawikhat chu an zilh deuh tawh. Mahse, an khawsak dan chu a la ngai reng.
Sual hi kan haw tak taka, kan do tak taka, mi awm tha duhlote hi kan vei tak tak a nih chuan, thil pawi lian zawk leh tam zawk, zau zawk leh nasa zawk an khawih hma leh, mi tla-hlang leh awm tha duh lote hi an kal thui lutuk hma hian, thil dik lo leh sual hi, a nuam chin leh hahdam chin, a lera do lovin, a thim a var thlu lova, a sur a sa hnuaia tih tak zeta, mahni hreawm pawisa lova, sual lo chhuahna leh an zalenna hmun, sual lo thanlenna hmun, hmun kilkhawr, a bulthum atanga beih a ngai tak zet ta e.
Hetiang hmun hi Veng hrang hrangah pawh a awm ngei ang.