Sudan-a indona khawpui chengten tampui an tuar mek

UN hnuaia food agency chuan indonain a tuam mek Sudanese khawpui, el-Fasher-a chengte chuan tam an tuar mek niin an sawi.
World Food Programme (WFP) chuan khawthlang lam, Darfur region-a khawpuiah hian kum khat chuang lirthei hmang chuan ei tur an phur lut thei tawh lo tih an sawi.
El-Fasher hi paramilitary Rapid Support Forces (RSF) chuan thla 16 dawn hual tawhin sipai kut atanga lak an tum.
WFP chuan tual chhunga thawktuten mi 3,00,000 chuang chenna khawpuiah hian tam avanga thi an awm tawh tih an sawi tih an sawi.
Sudan hi April, 2023 atang khan sipai leh an thawhpui thin, RSF nen thuneihna inchuhin tual chhung indona a chhuak a, khawvela mihring dinhmun chhiatna ber hmun a ni mek.
UN hnuaia naupang enkawltu, Unicef pawhin ram pumah ei tur an tlachham a, naupangte pawh ‘vunin tuh a tuam’ ang chauh an ni tawh tih an sawi.
WFP-in tampui mitthi tla thei a nih a puan hma hian North Darfur Governor Al-Hafiz Bakhit-a’n el-Fasher tawrhna chu a na tak zet tih a thlen a. Amah hi Sudan-a sipai kaihhruai sorkar thlawptu a ni a, sipaite hian Darfur-ah chuan he khawpui chauh hi an chan len a ni tawh.
RSF hian khawpui ber, Khartoum an hloh hnuah el-Fasher hi Sudanese sipaite lak atanga laksak ve ngei tumin an bei nasa nghal hle a ni.