Sudan-a puihna phur truck beihnaah mi panga thi

Sudan-a puihna phur truck beihnaah mi panga thi
Indona chhuah mekna, Sudan-a el-Fasher khawpuia tanpuina bungraw phur United Nations convoy beihnaah mi panga an thi niin UN agency-ten an sawi.
Thawhtanni zana North Darfur-a el-Koma bula beihna thlengah hian mi eng emaw zatin hliam an tuar a, truck tam tak hal a ni bawk tih an sawi.
Sudan-a tual chhung indonaa inbei mek pahnih, paramilitary Rapid Support Forces (RSF) leh sipai pangngaite chuan UN convoy hi drone hmanga beiah an inpuh tawn zui nghal.
UN chuan engtin nge beihna hi an tawh tih an puang lo va; mahse, chhui nghal an duh thu leh a titute pawh hrem ngei an duh tih an sawi.
Convoy-ah hian UN hnuaia ei tur leh naupang lam buaipuitu pawl tirh truck 15 an tel a, an thil tawn chu ‘pawi’ an tih thu leh puihna thilten ‘tam mai hlauhawma awm’ el-Fasher a thleng zo ta lo tih an sawi bawk.
El-Fasher hi North Darfur-a sipaiten an thunun zinga khawpui lian awm chhun a ni tawh a. Kum khat chuang chu civil mi leh sipaite chu RSF-in an lo bei tawh thin.
Convoy hian khawpui pan hian naupang leh chhungkaw mamawh nunna atana pawimawh ei tur leh chakna lam chi an phur niin World Food Programme (WFP) leh UN hnuaia naupang lam buaipuitu, Unicef chuan an sawi.
Beihna a thlen hnuah tual chhunga mahni inpea thawktu pawl, el-Koma Emergency Room chuan Facebook-ah video dah chhuakin puihna thil tam tak phur truck kang chhiate a lang a. An pawl hian Sudanese sipaite tihah an puh bawk.
RSF thununna hnuaia awm, el-Koma-ah hian a hmain sipai leh paramilitary indona thleng mekah hian beih an lo thawk fo tawh a. Khawpui beihnaah hian civil mi tam tak thiin thil pawimawh tak tak pawh tihchhiat a lo ni tawh thin.
El-Koma Emergency Room hian Pathiannia Sudanese sipaiten thlawhna hmanga khawpui an beihnaah mi 89 vel thi leh hliam an awm niin an lo sawi tawh a. Sipai hian beitua puhna hi an la chhang lo.
Sudan Tribune news website chuan thlawhnate hian el-Koma-a bazar lun lai ber an kap niin a tar lang.
Sudan-a indona chhuak mek hi kum hnih chuang kal ta atanga intan niin khawvela mihring baihvai tamna ber ramah a chang mek.
Thawhlehni khan refugee agency thupuangtu, Eujin Byun chuan mi maktaduai li chuang indona a chhuah atang khan an in leh lo chhuahsana an tlanchhiat tawh thu a sawi.
Tual chhung indona hi kum 2023-a sipai leh RSF ten thuneitu zawk an inchuh atanga chhuak a ni a. Lehlam lehlam hian an commander-te an intihthiam loh hnuah mipui rorelna rama Sudan a awm leh tura kal mek chu an tikhawlhkham a ni.