Sudan-ah paramilitary-in sorkar din veleh

Sudan-ah paramilitary-in sorkar din veleh
Sudan-a kum hnih zet tual chhung indona a awm mek laiin paramilitary-te chuan an do mek, sipaiten sorkar an din kalhin sorkar an din ve tih a puang.
Rapid Support Forces (RSF) hotu, Mohamed Hamdan ‘Hemedti’ Dagalo chuan an pawl chuan ‘Sudan ram hma hun a taka chantir tur’ sorkar an din tih a puang a ni.
Hetih lai hian buaina a chhuah atanga kum hnihna champhaah London khawpuiah mi pawimawhte an thutkhawm a, UK Foreign Secretary David Lammy chuan ‘muanna kawng zawh turin a sawm’ ve ve.
Indona a la kal zel a, sipaite chuan el-Fasher khawpui dana RSF tanhmun an bomb tih an sawi a, hei vang hian mi sang tel chu Zamzam refugee camp-ah an tlan luh phah.
Hemedti-a chuan RSF hian ‘dan hmanga rorelna sorkar’ an din tih sawiin mi mala rorelna a ni lo tih a sawi.
“Intihbingna kan kalpui lo va, inpumkhatna kan duh zawk. Hnam bil, sakhua leh ram bial bikin Sudanese nihna hi a hliah kan duh lo,” tiin Telegram-ah thu a chhuah.
A sorkar chuan mipui mamawh hrang hrang, zirna leh healthcare pawh ngaihtuahin RSF rorelna chauh ni lo, an ram pumah chu chu an kalpui dawn tih a sawi.
UN-in a sawi dan chuan tun hnaia RSF-in mi an beihnaah mi 400 chuang an thi a, an thu dawnna hi a rintlak tawk niin an sawi bawk.
Kum hnih an indo tawh chhungin sipai leh RSF hian dan tam tak bawhchhiaah an inpuh tawn a, mi sual leh mipat hmeichhiatna kawnga dan nasa taka bawhchhiaah an inpuh.
Hemedti-a hi Sudan army chief, Gen Abdel Fattah al-Burhan nen April 15, 2023 atang khan thuneihna inchuhin an inbei mek a, mi 1,50,000 chuang thi tawhin mi maktaduai 12 chuang baihvaiin an awm phah.
An inbeihna lian hnuhnung ber chu North Darfur khawpui, el-Fasher-ah niin Zamzam refugee camp-a awm sang tel chuan kein km 70-a hla, Tawila an pan a ngaih phah niin medical charity MSF chuan a sawi.
Tam tak chu tui halin an thleng a, naupang eng emaw zat tui tlachhamin an thi bawk.
Mi tanpuitu pawlte chuan el-Fasher chhehvela inkulhna hmun hrang hranga mi 7,00,000 chuangte chu tamin an awm niin an sawi a. Himna a derthawng a, puihna thil pawimawh thleng turin kawng dan a ni bawk tih an sawi.
Thawhlehnia ram hrang hrang thutkhawmah hian UK chuan ei tur leh damdawi lam atan £ maktaduai 120 pek leh turin thu an titlu a, Sudan chu ngaihthah lo turin ram dangte pawh a sawm.