Suga’n rui chunga scooter khalh vangin thupha a chawi nawn
August ni 6 khan BTS member Suga chu two-wheeler-in speed limit aia chaka a tlan avangin polic ten tidingin, an inbengberek ve deuh a, he thil thlen tukah hian thupha chawina pawh a tichhuak nghal a, mahse, kha thupha chawina hmasa kha duhtawk mai lovin a tinawn leh ta a ni.
Suga, kum 31, hian Weverse-ah kutziak ngei note post-in, “Zak tak chungin in lakah thupha ka chawi nawn leh duh a ni. Ka awmdan mawi lo avanga ka fans leh min duhsaktu rilru ka tihnual zawng zawng te chungah thupha ka chawi takzet a ni. Thil pawi tak ka tisual a, min hmangaihna leh duhsakna ka dawn ang tluka thil tiha rulh let che u hi ka bat a ni tih ka lo theihnghilh a ni,” a ti.
Suga chuan August ni 6 zan thil tlengah khan zu a in hnuah electric scooter khalhin thil a tisual tih a sawi a, a tira a thupha chawina post chuan fans a barakhaih hle a, “Ngaihtuah chiang lo ti mai mai lovin, fimkhur taka awm tur ka ni zawk a, mahse, chutiang chuan ka awm lo a ni,” a ti bawk.
He thil thlengah hian midang tumah mawhpuh kual lovin, a thiam loh leh dik lohna a pawm thlao a, “Keima thiam loh liau liau liau a ni. Ka pawlawhna avangin min duhsaktute harsatna ka thlen a. Tihsual nawn leh tawh loh ka tum ang a, simna nun ka nei tawh ang. He thil thleng avang hian member leh fan-te nena hriatreng tawh tur thil hlu tak kan neih tawh te ka tichhia a, BTS hming pawh ka tihliau a ni. Kan member leh team te tan harsatna ka siam avanga hrehawm ka tihna te hi sawichuah thiam a harsa zawk a ni. Keimaha rinna nghat ve thin member dangten keimah vanga harsatna an nei hi pawi ka ti takzet. Fans min support thintu zawng zawng te ka tihhnual dan tur pawh hi ka hrethiam a ni,” a ti bawk.
Suga hi central Seoul-a Yongsan District-ah zu nam chunga electric scooter a khalh avangin a license suspend sak a ni a, a scooter khalh laia a thisena zu (alcohol) awm zat hi 0.08 level a ni a, hei hi license suspend-na khawp a ni. Suga hian a apartment bul lawk a nih avangin zu nam chunga scooter khalh pawh chu pawi lo turah a ngai niin a sawi a. A tira an sawi danah chuan Suga hi a scooter khalh tum chu a tlu a, chu chu police ten hmuin, breathalyzer test an tih tir a, a inham tling ta hlauh a ni!