Sum kan chelek loa, party dang tan a chelek chi loh – K Sapdanga

Lok Sabha inthlan neih zawh takah sum an chelek loh avangin party dang tan chelek a ngamawm bik loa, kalphung thara inthlan danglam leh chhinchhiah tlak tak a ni tih ZPM hruaitu, minister K Sapdanga chuan a sawi.
Thawhtannia ZPM party office-a inkhawmah K Sapdanga hian he thu hi sawiin, ruling party berin sum an chelek miau loh avangin MP inthlanpuiah sum leh therhlo sem thawm hriat a ni loa, inthlan danglam leh chhinchhiah tlak kan tawn avangin Pathian leh mipui hnenah ZPM party chuan lawmthu an sawi tih a sawi a ni.
ZPM MP candidate Richard Vanlalhmangaiha chuan tlak huamin a ding a, candidate zinga lar lo ber kha tute emaw avangin candidate lar ber a ni ta hial tih a sawi. Inthlan hma khan grape chingtute chungchangah 35% a lar hle a, he thil hi a sawichhuak ve lem loa, mimal intih hmingchhiat a duh loh vang niin a sawi bawk.
“Sawrkar laipuiin Market Intervention Scheme neiin sum hloh rulh dan turah state sawrkar tum ve tur 25% leh central sawrkar tum tur 75% a awm a. Congress sawrkar lai khan chief minister-in lehkha min ziahsak mah se, state sum thawh ve tur 25% chu sum neih loh chhuanlamin min pe thei lo. A hnua MNF sawrkarah pawh matching share kan dil a, min pe thei lo. A tih theih dan tur nasa taka ngaihtuahin sum kan seng nasa a, 35% an sawiah khan chu’ng senso zawng zawng chu kan khungkhawm a, nasa taka min beih nan an hmang ta hlauh a ni,” a ti. Mimal intihhmingchhiat leh inbeih vak vak chu a duhdan a ni ngai loa, tih ngaihna a awm tak loah chuan hreh tak chungin criminal complaint a thehlut ta tih a sawi a ni.