Sum lama inbumna a tam ber Palzam lo turin CM-in a ngen

Cyber Crime Police Station-in complaint a dawn atanga zaa 70 chu sum lama inbumna a ni a. Chief minister chuan cyber crime leh a kaihhnawih thil chu palzam mai mai lo turin mipui a ngen. Mizoram Journalists’ Association (MJA) leh Mizoram Home department tangdun buatsaih ‘Seminar on Cyber Crime’ chu Thawhtanni atang khan tan a ni a, Serchhipah tan niin, bialtu MLA, chief minister Lalduhoma’n a hawng. Seminar hi District MJA huaihawta district hrang hranga neih tur niin, district tina tlawmngai pawl leh a kaihhnawih sawrkar department sawm vek an ni.
Information technology-a hmasawnna chak tak chu kan tangkaipui hle rualin, sawrkar pawh a hmang uartu a ni a, sum leh pai chelekna lam – internet banking, internet transfer, internet behchhana investment kan uar tawh a, chu chuan kan nitin nunah awlsamna tam tak a hmuh phah rualin, misualte pawhin technology thangduang tak hi mi bum nan an lo hmang ve mek bawk tih a sawi.
“Sawisel duh kan neih chuan puitling takin, hmaikawr vuah loin sawi mai ila, a awihtu leh a dawngsawngtu tan pawh a tha zawk ve ve a ni,” Lalduhoma hian a ti.
Sawrkar lakluh nia press conference a neih tumah pawh fake account hmanga midang beih chingte chu a tul anga an umzui zel tur thu a lo sawi tawh thu, fake account hmanga dawihzep taka midang beihna a tam chhoh zel a hlauh thu, fake account hmanga inbeihna ang chi hi kan sim loh chuan thenawm khawveng inbeihna atan pawh hman mai a hlauhawm thu te sawiin, cyber crime leh a kaihhnawih thil chu palzam mai mai lo turin mipui a ngen.
“Engemaw thil felhlel deuh kan tawk a nih chuan dan kengkawhtute hnenah a rang thei ang berin hriattir thin ila, mipui him theih nan zirtirna uar takin kalpui zel ang u,” chief minister hian a ti.
Seminar resource person, Cyber Crime addl. SP Zonunsanga chuan ‘cyber crime’ nihphung leh awmzia, social media hrang hrang hman fimkhur a tul dan powerpoint presentation hmangin a zirtir a. Information Technology Act 2000 hmang leh ram dan thar BNS (Bharatiya Nagarik Sanhita) hmanga hrem theih dan bakah Copyright Act leh Cinematography Act hman dan sawiin, zawhna chhan a ni.
SP Cyber Crime-ah hian kum 2020 ah case 12, kum 2021-ah case 25, kum 2022-ah case 158, kum 2023-ah case 72 leh kuminah case 33 ziahluh tawh niin, Cyber Crime PS-in complaint a dawn zaa 70 chu sum lama inbumna (financial fraud) lam a ni.