Sum tamna NBA

Khawvela ram ropui leh thil tithei ber USA-ah khuan infiamna lar ber chu ‘Rugby’ kan tih mai ‘American football’ a ni a. USA a infiamna lar ber dawttu chu Basketball a ni ve thung. Basketball hmanga team hrang hrangte inelna lian leh ngaihhlut ber chu ‘National Basketball Association (NBA)’ a ni a. Ram ropui leh thil tithei berin an atchilh leh an ngainat a nih av^ngin infiamna zawng zawngah NBA player te hi chawhruala hlawh nei tha ber an ni. Forbes-in kum 2025 a tihchhuah khawvela sport team hlu zual pariat zingah NBA team pathum ngawt an tel hial bawk.
Mizote pawhin kan uar tak >m >m Basketball hi kum 1891 khan khelh tan a ni a, a hmuchhuaktu hi Springfield, Massachusetts a Canadian Physical Education teacher James Naismith a ni. Kum 1891 a hmuhchhuah a nih hnu hian lar chak viau a, USA-ah chuan vahchap kang ang maiin a darh chak hial. Kum 1936 atang khan Summer Olympic-a inelna zingah Basketball hi telh tan a ni a. Olympic intihsiakna zinga tel a nih tirh lam hian professional player tel phalsak an ni lova, kum 1992 atang khan NBA player tel phalsak an ni ve ta chauh.
Batketball-a pawl lian leh changtlung ber National Basketball Association (NBA) hi June 6, 1946 khan Basketball Association of America (BAA) tiin din a ni a. Kum 1946-47 khan NBA season hmasa ber tan a ni. A tir lamah Basketball pawl hrang a awm ve neuh neuh a, chung zinga lian zual palite chu kum 1976 atang khan NBA-ah hian lungsi takin an inchhungkhawm ta a ni.
October atanga April thla chhunga khelh thin NBA ah hian team 30 an awm a. Team 30 zinga team 29 hi USA ram chhung a mi an ni a, team khat hi Canada-in an thawh ve thin. Team 30 te hi season khat chhungin vawi 82 theuh an khel a thin a. Vawi 82 theuh an khelhna hi ‘Regular Season’ tih a ni. NBA team 30 te hi conference pahnih; Eastern Conference leh Western Conference-ah team 15 ve ve in then an ni a. Game 82 theuh an khelh hnua a sang zual pariat ten dirrect-in conference play-off an khel zui leh thin. He dan hi June 4, 2020 atang khan tih danglam hret niin, a sang zual parukin direct-in play-off an khel a. Conference pahniha pasarihna atanga sawmnaa mi ten playoff khel tur zawnna hnuhnung ‘play-in’ an khel a. Play-in atangin team hnih ve vein playoff an khel phak leh thin.
Football angin NBA-ah chuan inhnehtawk a, point insem ang kha a awm ve lo va, chak zawk an awm ngei ngei thin. Hun pangngaiah an inhnehtawk a nih pawhin minute nga chhung an khelh belh leh thin a, hei hi ‘Overtime’ tih a ni. Overtime vawi khatnaah chak z^wk an awm thei lo a nih pawhin overtime dang an khelh belh zel mai a, chak z^wk an awm lo thei thin lo.
Conference champion nih tuma inelna hi ‘play-off’ an tih chu a ni a, quarter final atangin inelna hi neih tan a ni thin. Play-off ah hian Regular season-ah conference-a table chung ber luahtu khan play-in atanga inhlangkai, ranking-a hniam ber kha an hmachhawn thin a. Chutiang zel chuan an khingpui tur kha table-a an dinhmun atangin a hriat mai thin. Play-off hi game sarih khelh tura ruahman a ni a, game li la hmasa z^wk z^wk an chak mai thin. Team inhnehtawk lo deuhah chuan game li lekah inelna a zawh mai theih laiin, team inhnehtawk deuhah chuan game sarih khelh zawhah chak z^wk a chiang chauh thin thung. Tichuan, play-off; quarter-final, semi-final leh final khelh zawh a nih hnuin Conference champion ve vein NBA final game sarih an khel zui leh a. Chuta champion chu NBA champion tak tak an ni ta a ni.
NBA-ah hian Boston Celtic leh Los Angeles Lakers te chu vawi 17 ve ve champion tawhin, champion ngun ber an ni dun mek a. Anni hi record nei tha fal pahnih niin, intlansan thei an la awm lo.
NBA regular season hian player tha ber ‘Most Valuable Player (MVP)’ thlan an ni thin a. MVP hi chanchinbumi thlanchhuah mi 100 ten vote thlakin an thlang thin a, player panga hming; tha an tih dan indawtin an ziak lang thin. Pakhatna hian point 10 zel an hmu a, pahnihnain point 7, pathumnain point 5, palinain point 3 leh panganain point 1 khat zel an hmu a. Point belhkhawma point hmu s^ng ber khan MVP award an dawng zui ta thin a ni. Kum 2022-23 regular season-a MVP – Joel Embiid kha mi 73 zetin pakhatnaah an thlang a, mi 25-in pahnihnaah thlangin, mi pahnihin pathumnaah an thlang a, belhkhawmah point 915 zet a hmu tling. Philadelphia 76ers player pawimawh Joel Embiid hian tumhnih MVP ni zawn tawh Nikola Jokic aiin point 241 zetin a hmu tam zawk.
Regular season MVP bakah hian NBA Finals MVP a awm hrang leh a, hei hi chu NBA Finals a che tha bera ngaih hnena hlan thin a ni ve thung a. Football-ah khelh khata che tha bera an thlan ‘Man of the match’ ang deuh kha a ni e!
NBA a lar leh ngaihhlut hlawh >m >m pakhat a awm a, chu chu ‘All-Star Game’ a ni. Intisiakna ni lo, inkhelh fiamna (Exhibition) ‘All-Star Game’ hi February thlaah khelh thin a ni a, ni thum awh niin Zirtawpni atanga Pathianni chhungin khelh thin a ni. ‘All-Star Game’ a tel turte hi Regular season-a che tha zual 24 thlanchhuah thin an ni a. Player langsar tak takte an inhmachhawn huna bul tan turte hi, player, fans leh Media aiawh ten vote thlaka an thlan thlap an ni a. Bul tan tur thlangtu zingah Coach te telh an ni lova, coach te hian bul tan tur ni lo (reserve) an thlang thei ve thung. NBA ‘All-Star Game’ captain tur pawh hi vote hmanga thlan thlap an ni bawk. Basketballer tan chuan ‘All-Star Game’ a tel ph^k hi chawimawina tling a ni a. Basketballer tha tehna pakhat chu ‘All-Star Game’ an khelh zat hi a ni pakhat hial bawk.