Sum tih chingpen leh kidnap thubuaiah MSU president man

Mizo Students’ Union president Samuel Zoramthanpuia chu chhawmdawlna tur sum tihchingpen bakah sum phuta mi vau leh hrenluih thubuaiah man a ni a, thubuai siamsakna hi bail theih loh a nih avangin Central Jail-ah dahluh a ni.
The Aizawl Post thudawn danin, Samuel Zoramthanpuia hian Anti Corrruption Bureau (ACB) ah thubuai a nei a. Kum 2022-a MSU-in Health & Family Welfare department kaltlanga Covid Relief Fund hnuaia cheng nuai 50 a dawn leh, Chin Health Organisation kaltlanga MSU-in Myanmar raltlan chhawmdawlna atana Rs. 15,13,162 an dawn hman danah thil fel tawk lo awma hria in, ACB-ah hian FIR thehluh a ni. ACB hian preliminary enquiry tiin, kumin October 22 khan case a ziaklut a, hemi chhuina kal zelah hetihlaia MSU general secretary Samuel Zoramthanpuia hi sum tichingpentu leh mawhphurtu berah ngaiin Zirtawpni khan thu zawhfiah turin an la a ni.
Zirtawpni vek khan Aizawl Police Station chuan sum phuta mi vau leh hren luih thubuaiah Samuel Zoramthanpuia hi an man ve bawk a. Mizoram Power & Electricity department hnuaia contractor M/s Satnam Global Infraproject Ltd. thawktu tihluihnaa hren luih leh an laka cheng nuai hnih phut thubuai a ni.
Heng thubuaiah te hian Zirtawpni vek khan chief judicial magistrate Aizawl district hnenah police hian hruaiin, thu zawhfiah tura kawl phalsak turin an dil a, case siamsak a nihnaah hian bail theih lohna a awm avangin bail remti loin, thu zawhfiah a nih chhungin Central Jail-a dah turin court hian a ti a ni.