Sum tihchingpen thubuaia lang ve MLA C Ngunlianchunga’n bail la

Lawngtlai by pass road siamna tur sum tihchingpen thubuaia a hming lang ve MLA C Ngunlianchunga chuan Thawhlehni khan court-ah bail a dil a, phalsak a ni. MLA C Ngunlianchunga hi Special Judge (Prevention of Corruption) F Rohlupuia hmaah bail dilin a inlan a, a aiawha dingte chuan, thubuai chhuinaah a hming lang ve mah se, he thubuai chhui a nih chhung zawngin thu zawhfiah tura man a ni loa, investigating officer hmaa inlan tura tih a nihin a inlan a, amah hi cancer vei enkawl lai niin, Mizorama awm nghet a nih angin bail pek a nih avanga bikbo chhan tur a neih loh bakah he thubuai hi ngaihtuah tan chauh a ni bawk nen, MLA nilai a nih avangin man tawk palh ta se, a dinhmun hmuh hniam theihna a awm thei dawn tih a sawi a ni.
Sawrkar ukil-te chuan, he thubuaiah hian C Ngunlianchunga hi man pawh tum pawh a la ni lo hrim hrim a, bail a dilna phalsak a tulna a awm lo, tiin, bail pek a nih chuan he thubuaia court-a inlan tur thuhretute hmin theiin a zalen dawn tihna a nih avangin pawmsak lo turin an ngen ve thung a ni.
Special judge hian ngun taka a ngaihtuah hnu leh heti ang chi a court thurel awm tawh sa rawn chungin, C Ngunlianchunga bail dilna hi a phalsak a ni.
Lai Autonomous District Council chief executive member a nih lai, kum 2013 khan Lawngtlai by-pass road siamna atan NLCPR atanga sum hmuh vaibelchhe 11 ruahmana sum lokal hmasa cheng nuai 470 hman danah C Ngunlianchunga hi Anti Corruption Bureau chuan an chhuilut tel ve a, kumin March 10-a Assembly Session-ah chief minister Lalduhoma’n he thubuaiah hian a tel ve nia a sawi hnu ah a hre ve chauh a, hlauthawnna a neih loh thu leh anticipatory bail dil a tum loh thu a sawi thuthar thehdarhtute hmaah a lo sawi tawh.
Lawngtlai by pass road siamna atan ram lak turah ram neitute zangnadawmna pek tur, tia thuthlukna an siam tih loh engmah inrawlhna a nei lo niin a sawi a, sum lokal hmasa nuai 470 pawh CEM atanga a chhuah hnua hman a ni a, he case-ah tel ve nia sawi chu a tel lo a, sum thilah phei chuan a inrawlh loh piah lamah a hriatpuilo tih a sawi a ni.
He case chhuinaah hian ACB-in vawi hnih-thum chu thu an zawtfiah tawh a, chutianga case a lo nei a nih pawhin ram tan chuan tan a inhuam a, anticipatory bail pawh dil a tum lo tih a lo sawi tawh a ni.
ACB hian he case hi an chhui zo tawh a, chargesheet hi court-ah an thehlut tawh a ni. C Ngunlianchunga bakah hian hemi hnu lama CEM pahnih hming a lang a. Heng CEM hlui pahnih V Zirsanga leh V Zirsanga te pawh hian bail an la tawh a ni.