Sumdawn tumte tana inelna – Mizoram Rahbi 5.0 hawng

Planning & Programme Implementation department hnuaia Mizoram Startup Mission (MSUM) kaltlanga buatsaih tur, Mizoram Rahbi 5.0 chu Thawhtanni khan Mizoram Startup Mission Governing Board chairperson, chief secretary Dr Renu Sharma chuan a hawng.
Chief secretary chuan Mizoram Rahbi 5.0 kalpui tur chu sawrkar hmalakna pawimawh tak, sundawnna kawnga chin dan thar leh dangdai deuh ngaihtuah chhuak a, eizawnna ngelnghet siam bakah state sum dinhmun siamthat kawnga hmalakna a ni tih a sawi a. Sumdawnna leh eizawnna kawnga bul tan tum, hmabak eng takte chawikan nana ruahman a ni, tiin, “He intihsiaknaah hian Mizoram mi leh sa, tunhnaia sumdawnna kawnga hma la leh helama tuimite an tel thei dawn a, hemi kaltlanga titha thlanchhuahte chuan cheng nuai 7.5 thleng tanpuina an dawng thei dawn a ni,” a ti.
Mizoram Rahbi 5.0 hian state chhunga chengte leh chin dan thar, danglam bik hmanga mahni kutkea ding thei tura hlankai chu a tum ber a ni a. Hei hian intihsiakna mai ni lo, sumdawnna kawnga inhrilhhriat, sumdawng dangte nena inthlunzawm, a hralhna tur ngaihtuah bakah pawimawh dangte a huam tel a ni.
Ruahman dan chuan Mizoram Rahbi 5.0-a tel duh tan dilna hi kumin October 31 thleng hawn a ni a. Dilna thehluh hi November 5-6 chhungin business plan siam dan zirtir an ni anga, November 7-ah sumdawnna sawifiahin workshop neihpui an ni ang. November 18 ralhma in contestant-ten anmahni puala business plan an buatsaih an thehlut anga, hemi endikna atang hian November 22-ah contestant intihsiaknaa tel zel theite chinfel a ni ang. Thlan chhuahte tan November 26-28 chhungin sundawnna chungchang inhrilhhriat leh sawifiah dan zirtir an ni anga, December 2-ah final lutte puan a ni ang. December 5-6 ah boot camp neihpuiin December 11-ah sumdawnna chungchang sawifiah leh inhrilhhriat tawp ber neih a ni anga, December 12-ah result puan a ni ang. Mizoram Rahbi 5.0 hnuaia hamthatna dawng tura thlanten December 16-ah ‘final business plan’ an thehlut dawn a ni.