Sumdawngte leh dawrkaite hnena lehkhathawn

Lallunghnema
Charity Lodge
Cont: 9862288182

Ram mipui tana thawhpui duh tak te,
Chibai tha ber ka buk a che u.
In hnenah thu tak(truth) hmangin thu kam hnih khat lek sawi ka duh a. Min lo ngaihthlâksak ula, ka lawm hle ang.
Kei ve hi Mizo mipui tam tak hnena consumer-te dikna leh chanvo tlangaupuitu tlem tê zinga mi tling lo ber, mahse atchilha hun tam hmangtu ka ni a. Ka tha thawhte chu tam lo mah se, ka theih ang angin thu leh hla hmang leh tanpuina kut kê hmangin theih tawpin consumer-te tan ka thawk chho ve thin a.
Thu ziak rawngbawlna bâkah consumer te zinga harsatna tawkte chu theih ang ang ka lo buaipuiin nangni sumdawng lian pui puite, Dawrkaite chu ka lo hmachhawn tawh thin che u a ni. In zinga sumdawng lian leh dawrkai hausa te hmai sa tawn chang pawh ka ngah hle thin reng a ni. Chutih rualin mi tha tam tak in awm a, dik taka thil ti thin in awm bawk. Chungte chu khua leh tui tha ka ti thin a ni.
Tunah hian nangni sumdawng leh dawrkai te hriat tur Dan lam sawi ka tum lova. In eizawimnna kawnga in lo hriat ve tur leh in tana tha tur nia ka hriat thenkhat ka sawi mai dawn a ni.
He lehkhathawnah hian in thil tih that emaw in thil tih dik loh lam sawi ka tum lo. In tan leh keini consumer-te tana tha tur nia ka hriat hetiang hian ka sawi duh:
1) In customer-te tha takin lo dawngsawng rawh u. Lo tûm khum suh u.
2) Lo chapo khum hek suh u.
3) |awngkam tha hmangin lo lâwm (welcome) zel rawh u.
4) Lo lêng rawh, eng nge i duh? tih hi a mawi hle.
5) In customer-te chu an duh zawng lo thlantir rawh u.
6) An duh zawng thlantir hi in mawhphurhna a ni.
7) Thil an lei loh avangin thinrim hmêl hmuh reng reng suh.
8) Nangni sumdawng-te u, in tel lovin consumer-te hi an awm thei a, anmahni tel lovin in awm thei lo tih hria ang che u.
9) MK Gandhi-a khan in customer-te kha VIP a ti a, inleng pawimawh ber a ti a ni!
10) Economist ropui leh sumdawng hausa American pachal chuan “Consumer is King” a ti a. In ti ve thei ang em?
11) Bungraw chhia, hman tlak lo hralh chhuak lo turin ka ngen che u a ni.
12) Mihring hriselna atana tha lo ei tur, in tur zuar lo tur leh hralh lo turin ka ngen bawk a che u.
13) Maximum Retailed Price aia sanga thil hralh leh rate aia sanga thil zuara hralh lo turin ka duh takzet che u a ni.
14) Buk tling lova thil hralh hi Dan bawhchhiatna a ni a, eirukna a ni.
15) Buaina a awm hlekin phili chung lo ula, in bungrua te kha chhep relh thin tawh suh u.
16) Buaina a awm hlekin in thil zawrh lai man (price) tisang hek suh u.
17) Chhuanlam fahrah te te siamin phuahchawp rate insiam ve ngawt zel suh u.
18) Expiry Date ngai pawimawh ula, expiry date hnu lam thil hralh ching suh u. Mihring nunna atan a tha lo leh zual a ni.
19) In dawr thil lo chu in hralh chhuah hmain endik vek ula, a chhia chu hluihlawn zel turin ka duh che u a ni.
20) Nangni chawhmeh, thei etc. zuartute u, in thil zawrh te vawng thianghlim hle rawh u.
21) Dan hnuaiah in thawk tih hre reng ang che u aw!
Ka duh tâwk dawn tawh ang a, hei hi ka la sawi duh.
Nangni dawrkai, sumdawng leh chawhmeh, thlai zuartute hi ram mipui tan in tangkaiin in hlu em em a. In tel lo chuan mipui hi kan khawsa thei lo a ni. Nangmahni-ah hian ram economy a innghat thui em em a. In sum che vel hi kan lo thlir reng a. Ram tan pawh in thawh hlawk em em bawk a ni. In hmelah hlimna ni êng kan beisei a. In awm dan azirin kan lungngaiin kan lungngai lo mai a ni. Mahse, hei hi hre leh teh u, thil leitu an awm loh chuan a hralh theih loh. Hmangtu a awm loh chuan hna a thawh theih loh. Chuvangin inring tawn, innghat tawn kan ni.
Consumer-te chu in sum hnar an ni a. In dawra an lo kal hian VIP enin lo en hram teh u. A then mi hawihhawm lo, a then mi fel an ni ang. Mahse, hawihhawmna leh dawhtheihna hian a hneh thin. Hlawhtlinna a ni bawk. Chuvangin kan thupui tur chu customer satisfaction ni se, chu ngei chu hlawhtlinna a ni. Ram economy siamna pawh a ni.
Duhsakna sang ber ka hlan a che u.
In tana chhen fakawm lo,
Lallunghnema
Consumer Activist; Charity Lodge