Sumdawnna sawi turin Vance-a’n India tlawh dawn

Sumdawnna sawi turin Vance-a’n India tlawh dawn
US Vice-President JD Vance chuan karlehah hian ni li chhung India tlawhin Prime Minister Narendra Modi-a nen an inkawm ang a, sumdawnnaa inremna tur hrang hrang an sawi dun ang.
Hruaitu pahnihte hi Vance-a’n a tlawh ni hmasa ber, Thawhtannia inbe tura ruahman niin economic, sumdawnna leh inkungkaihna thil dang an sawi ang.
“He intlawhna tur hian lehlam lehlam tan inkungkaihna ennawna siam tharna tur remchang a siam dawn a ni,” tiin India-a foreign ministry chuan thu a chhuah.
Vance-a hi vice president a nih hnua ram dangte nena sumdawnna kawnga harsatna neuh neuh an neih hnua a zin vawi khatna tur a ni.
Vice-president hi a nupui, Usha Vance leh an faten an zui dawn a. A nupui hi India chhim lam, Andhra Pradesh lam mi niin a nu leh pate US-a an pem hnua piang a ni thung.
US hruaituin India a tlawh dawn lai lai hian China nena sumdawnnaa an inbeih lai mek niin President Donald Trump-a chuan an rama Chinese bungraw luta chhiah lak chu 145%-in a tisang a, thenkhatah phei chuan 245%-in a sang thei hial dawn a. China pawhin US siam thilte lak luhna chu 125%-in a tisang ve bawk.
India hi US-in April 2-a chhiah lak a tihpui zingah telin 27%-in a sang dawn a; mahse, ni 90 chhung atan hman loh turin tih leh a ni rih.
Hemi hnuah hian Delhi leh Washington hi sumdawnna thila inremsiamna nei turin hma an la dun reng.
India hian US bungrua a lak luh thin tam takah chhiah a lak thin chu a titawp a, Trump-a vauna laka an fihlim theih nan a dang pawh a tihtawp leh rin a ni.
Tun hnai lawk thlengin US hi India-in a sumdawnpui lian ber a ni a, an inkara sum chevel hi $ tluklehdingawn 190 a tling.
Modi-a hian US nena an inkungkaihna chu lian tak a nih thu sawiin hruaitu pahnihte hian India-in America atangin thil tam zawk a lak luhna turin an inrem tih an sawi a, heng zingah hian tuialhthei leh boruakalhthei pawh a tel.
Trump-a leh Modi-a hian an inkara sumdawnna chu tihlen zela $ tluklehdingawn 500 hawlh phak an tum.
India leh US hi ram pali – India, Australia, US leh Japan awm khawmna, Quad an tiha huhang ngah tak niin he pawl hi China-in Indo-Pacific-a huang zauh zel a tumna lo dang tura indin an ni.
Vance-a’n India a tlawh hma lawk hian Chinese President Xi Jinping-a pawhin Asian chhimchhak ramte tlawh kualin Washington nen sumdawnnaa inbeihna nasa tak an neih mek laiin heng a tlawh ram nena inkungkaihna nghet zawk an neih dan tur a dap a ni.
Vance-a hian India a tlawh hmain Italy a tlawh hmasa dawn a. Prime Minister Giorgia Meloni-i nen an inkawm ang.
President Trump-a sorkarah hian Vance-a hi ram dang nena an inkungkaihna siamna kawnga pen chhuak deuh ber a ni.