Sumit Nagal tla fel ve leh

Chennai Open Challenger tennis tournament khelh mekah Ningani khan India No. 1 Sumit Nagal chuan set thum inbeihnaah Russian Petr Bar Biryukov hneh loin second round a paltlang zo lo.
He hmuna champion ve tawh Nagal hi 6-4, 6-7, 3-6-in big-serving left-hander Biryukov lakah hian a tlawm a, a hneh loh Russian player kha world ranking-ah No. 305-na a ni mek.
Ningania match khelh chhung rei ber chu fourth seed Ilia Simakin laka Australian Philip Sekulic tlawmna inkhel niin, darkar thum chhungin Simakin hian Sekulic lakah 4-6, 7-5, 7-6 (1) hnehna a sualchhuak hram a, semi-final pakhat zawkah Simakin hian Biryukov hmachhawnin, tu zawkin nge final lut tarlan hman a ni ta lo.
Ningani vek khan Indian qualifier Sidharth Rawat (ranked No. 715) chu ranked No. 419 Maks Kasnikowski lakah straight sets-in a tlawm a, Pole zawk hian 6-2, 6-3 hnehna nen last eight a lut.
Doubles draw lamah top seeds Niki Kaliyanda Poonacha leh Pruchya Isaro thawkdun pawhin last four an luhna kawngah 6-4, 6-1-in wildcard pair Lohithaksha Bathrinath/Abhinav Sanjeev Shanmugam an paltlang a, Indian pair ve bawk SD Prajwal Dev/Nitin Sinha an hmachhawn leh ang.
Third seeds Dev leh Sinha inkawp hian semi-final lut turin Indian ve ve tho Ishaque Eqbal leh Manish Sureshkumar tangdun lakah 4-6, 6-2, 10-8 hnehna an chang.
Second seeds Siddhant Banthia leh Saketh Myneni tangdun chu 7-5, 6-4-in Ningania quarter-final match hnuhnungberah Indo-British pair Sasikumar Mukund leh Jay Clarke chuan an vaw tla.